Demokraatit: Naalakkersuisut uumassusilinnik ataqqinninngillat

- Naalakkersuisut nunatta avannaani piniartunut qilalukkanik qernertanik 100-nik pisasseeqqinnerisigut, pisuussutinik uumassusilinnik ataqqinninnginnerat kingumut ersersinneqarpoq.

Demokraatit sinnerlugit inatsisartuni ilaasortaq, Jens B. Frederiksen taama allappoq.

Taanna inatsisartut aalisarnermut, piniarnermut nunalerinermullu ataatsimiititaliaannut aamma ilaasortaavoq.

Naalakkersuisut qilalukkanik qernertanik pisasseeqinneranni maannamut pisassiissutigineqartut katillutik 385-inngormata, aalisarnermut piniarnermullu naalakkersuisumik Finn Karlsen-imik mianersoqqusisariaqalerlutik Demokraatit allapput.

Pinngortitaleriffiup innersuussutigisimasaat pingasoriaatingajammik qaangerneqarput, Jens B. Frederiksen allappoq, naalakkersuisullu taamatut aalajangiinerminni EU-mik, NAMMCO-mik CITES-imullu tunngatillugu neriorsuisimanerminnut akerliulluinnartut, Demokraatit allapput.