Demokraatit: Naalakkersuisut piareersarnerluppallaarput

- Naalakkersuisut pilersaarusiornerluppallaaqaat, Demokraatini ilaasortaq Palle Christiansen taama sakkortuumik isornartorsiuivoq.

Naalakkersuisut oqaluuserisassat ilaannik tunniussisisimannginnerat pissutaalluni marlunngorpat oqaluuserisassat ilai kinguartinneqartariaqalersimanerat Palle Christiansenip isornartorsiuinerminut tunngavigaa.

Inatsisartut marlunngorpat marlunnik oqaluuserisassaqaraluarput, taakkuli oqaluuserineqarnissaat kinguartinneqarpoq!

Naalakkersuisut oqaluuserisassat naammassisimanngilaat, tamatumalu kingunerisaanik oqaluuserisassat allanngortittariaqarsimapput. Aatsaat taamatut pisoqalinngitsoq Demokraatinit oqaatigineqarpoq. Naalakkersuisut oqaluuserisassanngortitsisarnerat Demokraatit utaqqikatappaat, paasisinnaanngilaallu naalakkersuisut tunniussivissaq eqqorlugu tunniussisannginerat.

- Naalakkersuisut oqaluuserisassanik saqqummiussiniaraangamik kingusissorujussuarmik nassiussuisarput. Partiitsinni itisilerlugit eqqartornissaanut iluamik periarfissaqarfigineq ajorparput taamalilluni inatsisartuni oqallinneq killilerneqartarpoq. Tamannalu ajorpallaaqaaq, Palle Christiansen oqarpoq.

Politikerit suliniarnerannut tamanna qanoq kinguneqarsinnaanersoq aperineqarami ima akivoq:

-Pilersaarusiorsinnaajunnartarpugut. Assersuutigalugu oqaluuserisassat oqaaseqarfiginissaanut sapaatip akunneranik periarfissaqarsoriniarluta ullunik marluinnarnik periarfissaqaleriasaartarpugut. Naalakkersuisuni ilaasortat ataatsimiinnerup nalaani aamma angalaleriasaartarnerat peqqutaalluni ullormiit ullormut oqaluuserisassat allanngortinneqartarput. Tamanna ajorpallaaqaaq kingunerisarpaami politikerit sulinerat tamarmi ajorsiartortarmat. Sunalu akuersissutigissanerlugu naggataatigut nalornissutigineqalersinnaasarluni, Palle Christiansen oqarpoq.

Inatsisartut tulleriiginnangajannik ataatsimiinnerat tassunga utoqqatsissutaasinnaanersoq aperineqarami, akivoq tamanna utoqqatsissutaasinnanngitsoq ulloq ataatsimiiffissaq kikkunnit tamanit ilisimaneqarmat naalakkersuisullu pilersaarusiornerlussimasutut nalilerusullugit.

Inatsisartuni ataatsimiinnissaq sapaatip akunnerinik tallimanik sioqqullugu partiit tamarmik siunnersuutaat tunniunneqareersimasussaapput. Inatsisartulli siulittaasoqarfiannit immikkut akuerineqarluni kingusinnerusukkut tunniussisoqarsinnaavoq.