Demokraatit naalakkersuisunngortunut tapersersuiniarput
Inatsisartuni illuatungiliuttut Demokraatit naalakkersuisoqatigiilersussanut Siumumut Atassummullu inatsisartuni tapersersuisuunissamut piareersimapput. Tamanna partip naalakkersuinermut tunngasunik oqaaseqartartuata Palle Christiansenip uppernarsarpaa:
- Naalakkersuisooqataalernissarput pineqanngilaq, kisianni ippassaq unnukkut isumaqatigiinniarpugut naalakkersuisooqatigiilersunut tapersersuisunngorsinnaanerput eqqarsaatigalugu. Tamatumani eqqarsaatigigatsigik iluarsartuusseqqinnerit angisuut suliarineqartussat inatsisartuni tunuliaqutarissaarluni suliarineqarnissaat angorusukkaluaratsigu, taamaalilluni innuttaasut piumasaat naammassineqarsinnaaniassammata, soorlu assersuutigalugu utoqqalinersiat qaffanniarneqarnerannut atatillugu. Kisianni isumaqatigiinniaraluarnivut unnuap qeqqanut qiteqquttoq unitsiinnarpavut.
Palle Christiansen aperineqarami naalakkersuisunngortussanut tapersersuisunngorniarnerminnut angivallaamik piumasaqarsimanersut oqarpoq nammineq isummani malillugu angivallaanik piumasaqaateqarsimanatik. Ilaatigut ataatsimiititaliani inissat pingaarutillit eqqartorneqarsimagaluartut oqaatigaa. Maannali isumaqatigiinniaraluarneq unereermat annerusumik iserfiginiarnagit Palle Christiansenip oqaatigaa.
Demokraatit piumasaqaataasa ilagigaluarpaat naalakkersuisoqatigiinngortut Inatsisartut ukiakkut ataatsimiinnerata ulluani kingullermi qinersinissamik nalunaaruteqarnissaminnik neriorsuissasut.
Naalakkersuisoqatigiinngortut Inatsisartuni ilaasortanik 16-inik tunuliaquteqarput illuatungiliuttullu 15-inik tunuliaquteqarlutik. Palle Christiansenip naalakkersuisunngortut sivisuumik atanissaat ilimaginngilaa. Aningaasanut inatsisissaq tullianik isumaqatigiinniutigineqalerpat naalakkersuisunngortut ajalusoornissaat naatsorsuutigaa.
