Demokraatit naalakkersuisunngortitsisinnaanertik aalajangiusimavaat

novembarip 16-at 2005 10:32

Demokraatit naalakkersuisunngortitsisinnaanertik atituumik tunngaveqarlutik aalajangiusimavaat.

Demokraatit siulittaasuata tullia, Palle Christiansen oqarpoq, Inuit Ataqatigiillu atituumik tunngaveqarlutik naalakkersuisunngortitsisinnaanissaminnut, Atassut aalajangeeqataalluinnartussatut maanna inissisimasoq.

- Atassut ippassaq attaveqarfigaarput neqerooruteqarfigalugulu. Oqarfigaarput uagutsinnik suleqateqassagunik tutsuiginassusermik tunngaveqarlutik naalakkersuisooqataanissamut periarfissaqartut. Aamma oqarfigaavut, illuatungaani Siumukkunnik, ulluinnarni tutsuiginanngissusermik ileqqorlunnermillu tunngaveqarlutik ingerlatsisunut, suleqateqarnissaq aamma periarfissarigaat, Palle Christiansen erseqqissaavoq.

Palle Christiansen aamma oqarpoq, Demokraatit qineqqusaarnerminni tunngavigisatik tallimaasut aalajangiusimagitik. Taamaattorli oqarpoq, illutungeriinni pilliuteqartoqarusussappat, isumaqatigiinniarnikkut tamanna anguniarneqartariaqassasoq.

Atassutikkut akissuteqarsimapput, Siumukkunnik oqaloqateqareerunik, Demokraatinik oqaloqatiginnissallutik.

Radioaviisimilu paasivarput, Atassut Siumullu ullaap tungaani nalunaaqutaq quliniit ataatsimeeqatigiittut.