Randi Vestergaard EvaldsenAssi: Jonas Fievé/KNR

Demokraatit naalakkersuisunngortitsiniarnermut isumaqatigiinniarnernit tunuartut

Inatsisartut nutaat ivertinneqarpata, Demokraatit illuatungiliuttutut inissisimassapput.

Demokraatit Kim Kielsenip naalakkersuisoqatigiit pillugit isumaqatigiinniarluarnissaanik kissaappaat. Partiilli naalakkersuisoqatigiinnut ilaanissani takorloorsinnaanngikkaa, Demokraatit siulittaasuat, Randi Vestergaard Evaldsen, tusagassiuutinut pingasunngormat unnukkut nalunaaruteqarluni allappoq.

Partiillu naalakkersuisoqatigiinniinnissanimut piumasai naammassineqarsinnaasimanngitsut, Randi Vestergaard Evaldsen KNR-imut oqarpoq.

- Naammassineqarsinnaannginnamik, naapissinnaanngeriaratta Kim Kielsen nalunaarfigaarput, isumaqatiginninniarnerni unilluta, Randi Vestergaard Evaldsen oqarpoq, itisiliillunilu.

- Assersuutigalugu, akileraarutitigut oqilisaassinissaq, Demokraatinit pingaartitarput, inuit sulisartut tamarmik oqilisaaffigineqarnissaat piumasarigatsigu, taassumalu saniatigut aamma selskabskatip appartinnissaa piumasarisimavarput. Ilaatigut tamakkua naammassineqarsinnaasimannginnamik, Randi Vestergaard Evaldsen oqarpoq.

Demokraatit angusaqarfiusussamik illuatungiliuttuunissartik oqaatigaat, partiinullu allanut suleqatigiiffiusinnaasut arlaliusut isumaqarput. Partiillu assigiinngitsut suleqatigiissinnaanissaat nunatsinnut pingaaruteqarluinnartoq Randi Vestergaard Evaldsen oqarpoq.

- Qineqqusaarnerup nalaani ilaatigut takusinnaavarput, assigiinnik anguniagaqartugut. Soorlu meeqqat atornerlugaasimasut eqqarsaatigalugit, tamatta tassani aaqqeerusuppugut. Tamakkuuppullu suliarisassagut siullerpaat, ataatsimoorluta qaqitassagut, Randi Vestergaard Evaldsen oqarpoq.

Aamma aalisarnermut inatsimmut ikioqatigiittoqarsinnaasoraa.

- Innuttaasunut inuiaqatigiinnullu aalisarnermut inatsiseqalernissarput aamma siunertaraarput. Aamma soorunalimi partiit allat aalisarnermut inatsisissaq pillugu oqaloqatigiumaarpagut, Randi Vestergaard Evaldsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat