Demokraatit naalakkersuisooqataaqqilernissaminnut periarfissaq ammatikkaat
Inatsisartunut 2018-imi qinersinerup kingorna Demokraatit Siumumut naalakkersuisooqataarusunnatit ikorfartortaalerput. Siumumi eqqissiviilliortoqarnerarlugu Demokraatit taamani siulittaasuata Niels Thomsenip naalakkersuisooqataarusunnginnerminnut tunngavilersuutigaa. Maanna ukiut marluk qaangiussimalerput, Demokraatillu isumaat allanngorsimavoq:
- Periarfissanut ammajuaannarnikuuvugut. Taanna oqaatigerusuppara. Eqqunngitsumik oqassuunga oqaruma "naamerluinnaqqissaaq periarfissat tamakkua eqqarsaatigineq ajorpagut".
- Tapertatut inissikkatta anguniakkagut tamaasa angoreersimalerpagut. Taamaattumik uatsinnut peqqinnarpoq eqqarsaqqinneq, kisianni itisilersinnaanngilara alloriaqqinnissaq qanoq isikkoqarumaarnersoq, Demokraatit siulittaasoringallagaat Nivi Olsen oqarpoq.
AAMMA ATUARUK Demokraatini siulittaasunngorusuttunik suli sassartoqanngitsoq
Inatsisartunut qinersinermi kingullermi Demokraatit naalakkersuisoqatigiinnut Siumumut, Partioi Naleqqamut Nunatta Qitornaanullu ikinnerussuteqartunut ikorfartortaalerput. Partii Naleraq kingusinnerusukkut naalakkersuisoqataajunnaarpoq.
Aningaasanut inatsit akitsuutillu Demokraatit akuerseqataanerannit amerlanerussuteqartut akuersipput. Akitsuutit siorna atuutsilersinneqarmata sukkut, tupat aalakoornartullu akitsornerannik ilaatigut kinguneqarpoq.
Nunatta oqaluttuarisaanerani politikkikkut angusaq annertooq
Nunatta oqaluttuarisaanerani politikkikkut aalajangernerit annerpaartaasa ilaannut, tassalu Ilulissani Nuummilu mittarfissualiortiternissamut taasinermi Demokraatit ikorfartortaallutik akuerseqataapput. Partiilu anguniagaqartuartariaqarmat Demokraatit naalakkersuisooqataalersinnaanerminnut eqqarsaasersulersimasut, Nivi Olsen oqarpoq.
- Inuiaqatigiinni oqaluttuarisaanermi aatsaat taama angitigisunik aningaasarsiorfissamik qulakkeerisoqarpoq. Taannalu alloriarnerit pingaartorujussuit ilagisimavaat.
Partiillu ineriartortuarnissaa Nivi Olsenip pingaartitaraa.
- Nutaanik anguniakkanik peqarnissarput qulakkeertariaqaratsigu ineriartornissaq unittuussanngippat. Taamaattumik eqqarsaatersuuteqarpugut periarfissanik, Nivi Olsen taama oqarpoq.
Taassuma Naalakkersuisut siulittaasuat Kim Kielsen (S) taperserlugu siorna oqaatigaa. Siumullu aasaru nutaamik siulittaasortaassappat, Siumut Demokraatit apeqqusiinertaqanngitsumik tapersersuinnarsinnaanavianngikkaa, Demokraatit siulittaasorigallagaat taamani oqarpoq.
Demokraatit naalakkersuisoqatigilernissaannut tikilluaqqugitsik Siumup siulittaasuata tulliata, Inatsisartuni gruppimi siulittaasuutigisup Karl Kristian Krusep aviisimut Sermitsiamut una qaammat oqaatigaa. Isumaqatiginninniartoqalersimanngitsorli erseqqissaatigalugu.
Karl Kristian Kruse KNR-imit ullaaq manna oqaaseqartinniarlugu attaviginiarsarigaluarparput, iluatsinnaguli.
