Demokraatit: Meeqqanut ileqqaarutit aningaasaliissutitut atorlik

Meeqqanut suliniutissatut atorneqartussat 83 millioni koruuninik naleqartut Demokraatit ippassaq saqqummiuppaat. Atuartut tamarmik akeqanngitsumik nerisaqalernissaat aammalu meeqqat inuusuttullu ornittagassaannik illoqarfinni tamani sanaartortoqarnissaa Demokraatit siunnersuutigaat. Demokraatit siunnersuumminni takorloorpaat meeqqat ileqqaarutaannit ilaatigullu KNR-imut tapiissutit sipaarniarfigineqarsinnaasut siunnersuumminnut aningaasaliissutissatut.
Allattoq Lotte Holm
marsip 10-at 2009 11:18

- Demokraatit aningaasaqarneq pillugu oqaaseqartartuat, Palle Christiansen, oqarpoq, meeqqanut suliniuteqarnissanut aningaasaliinissaq pingaaruteqarmat ilaqutariinnermut peqqinnissaqarfimmullu naalakkersuisoqarfimmut aningaasaliinissaq pingaaruteqarpoq, naalakkersuisoqarfik taanna aningaasanik pisariaqartitseqimmat. Aningaasanut inatsit misissuiffigaarput tassanilu aningaasanik pisariaqartitsinnginnerusut immikkoortillutigit.

Meeqqanut suliniutissat, ilaatigut atuarfinni nerisaqartitsinermik aamma meeqqat inuusuttullu illoqarfinni tamani ornittagaqarnissaannik, imaqartoq, partiinut allanut pilerinarsinnaavoq. Aningaasalersornissaali partiinut allanut aalassatitsisinnaalluni, soorlu naalakkersuisuutitaqartunut Siumumut.

Alumiuniumik aatsitsiviliornissamut Namminersornerullutik Oqartussat aningaasaliissutissaat 12,4 millioni koruuninik ilanngarniarpaat. Nunami inuussutisarsiutinik takornariartitsinermik ineriartortitsinermut tapiissutissat 80 procentimik sipaarniarpaaat.

Namminersorneq pillugu allaffik Demokraatit matoqquaat, ICC-mullu tapiissutit ilanngaqqullugit.

KNR-imi ingerlatsinermut aningaasaliissutit arfinilerarterummik ilanngarneqassasut, aammalu aallakaatitat sinerissamut siammarternerannut Tele-mut akiliutit ilanngangaatsiarneqassasut Demokraatit isumaqarput.

Aamma Meeqqanut ileqqaartitsineq atorunnaassasoq, nunaqarfinni avinngarusimasunilu nammineerluni illulionermut aningaasaliissutit ikilineqassasut, kiisalu puisit amiinik tunisinermi tapit affaannanngortuinneqassasut partii isumaqarpoq .

- Meeqqat pillugit suliniutissatut Demokraatit siunnersuutaanni siunnersuutit ilaat partiinit allanit aalassatsitsisinnaapput. Palle Christiansen tamanna pillugu oqarpoq, assersuutigalugu meeqqat 18-iniliinissaannut aningaasanik ileqqaarinerit meeqqat 18-iliinissaat angerlarsimaffianniilluunniit nuunnissaat utaqqinagu ileqqaakkat maanakkut atorneqalissasut, Palle Christiansen oqarpoq, tamanna allanut aalassatsitsisinnaavoq kisianni uagut isumaqarpugut tamanna iluaqutaassasoq.

Aamma puisit amiisa tunineqartarnerinut tapiissutit meeqqanut suliniutinut nuunneqassasut Demokraatit isumaqarput, Palle Christiansen naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq