Demokraatit matuersaat paarivaat

Pingasunngormat ualikkut Nuummi kommunip allaffianut isumaqatigiinniarnissamut qaaqqusisoqarpoq. Kommunalbestyrelsimi siunissaq pillugu oqaloqatigiinnissamut IA-p partiit allat aggersarsimavai. Qinersinerup inernera amerlanerussuteqarnissamut assigiinngitsunik periarfissiivoq. IA arfineq pingasunik ilaasortaatitaqarluni periarfissagissaarnerpaavoq, Demokraatillu peqatigalugit, imaluunniit Atassutip ilaasortaatitaa ataaviitsorlu Anni K. Rasmussen peqatigalugit amerlanerussuteqalersinnaalluni. IA-p Asii Chemnitz Narupillu taamaalillutik ilaasortaatitat pisariaqartut qulit angusinnaavaat.

-Oqaloqatigiinnerput pitsaasumik ingerlavoq, aamma isumaqataaffigisagut arlaqarput. Maanna marlussoriarluta oqaloqatigeereerpugut, IA-llu siunissamut pilersaarutai tusarfigerusuppagut, Anda Uldum KNR-imut nassuiaavoq.

Siumut Martha Abelsenip borgmesterinngortinnissaanut amerlanerussuteqalerniarluni isumaqatigiinniarnissaminut periarfissaqarpoq, borgmesterinngorniarunili Demokraatit ilaasortaatitai marluk avaqqutiinnarsinnaanngilai. Aammattaaq Siumup ilaasortaatitat allat marluusut arlaat suleqatigisariaqassavaa. Atassutip Siumullu Naalakkersuisooqatigiinnermi suleqatigiilluarsinnaammata, Martha Abelsenip tassuuna suleqateqarsinnaanera periarfissaasinnaavoq.

-Martha Abelsenimit kaffisoriaqquneqarpugut. Mamarluinnartumik kaffillerpoq, aamma ullumikkut kingusinnerusukkut oqaloqatigeeqqittussaavugut. Suut oqaluuserisimanerlugit oqaluttuarisinnaanngilara, taamaaliussaguma eqqortuliornerunanilu silatusaarnerussanngilaq, Anda Uldum knr.gl-imut oqarpoq.