Demokraatit marlunnik naalakkersuisuutitaqalerput

Demokraatit siulittaasuata tullia Palle Christiansen aningaasaqarnermut naalakkersuisunngussaaq partiillu siullittaasua Jens B. Frederiksen ineqarnermut attaveqarnermut avatangiisinullu naalakkersuisunngussalluni.
Allattoq Jaaku Lyberth
juunip 09-at 2009 10:18

Palle Christiansen inatsisartut aningaasaqarnermut ataatsimiititaliaanni ukiuni arlalinni ilaasortaavoq, taamaammallu aningaasaqarnermut naalakkersuisunngornissamut piukkunarnerusoq, Jens B. Frederiksen oqarpoq.

Inissianik attartortakkanik sanaartornerup annertusarneqarnissaa ineqarnermut naalakkersuisunngortussap Jens B. Frederiksenip sulissutiginiarlugu oqarpoq.

- Kikkut pissaanermik tigumminnissanersut, Demokraatinit pingaartinneqanngilaq, piginnaasat atorluarneqarnissaat pingaartinneqarneruvoq, Jens B Frederiksen oqarpoq.

Innuttaasut qanoq amerlatigisut inissianik pisinissaminnut periarfissaqarnersut, Jens B. Frederiksenip ineqarnermut naalakkersuisunngoruni misissorniarpaa.

Taassuma saniatigut inissiat attartorneqarsinnaasut qassit sananeqassanersut, Jens B. Frederiksenip misissorniarpaa.

Piginneqatigiilluni illuliornerit, nammineq pigiligassatut inissialiornerit aammalu sulinermut atatillugu inissiat, naalakkersuisuusimasunit sammineqarnerussimapput, Jens B. Frederiksen ineqarnermut naalakkersuisunngortussaq oqarpoq.

Inissianik attartorneqarsinnaasunik sanaartornerup annertunerunissaa Demokraatinit kissaatigineqarpoq.

Jens B Frederiksen aamma Palle Christiansen inatsisartuni ilaasortatut sulinnngiffeqarnissaminnut qinnuteqarput, Demokraatini sinniisussatut inissisimasut, Andreas Uldum aamma Justus Hansen, inatsisartut ataatsimiinneranni inatsisartuni ilaasortatut inissinneqarnissaat demokraatinit siunnersuutigineqarpoq.