Demokraatit marlunnik atuuffeqartuaannarnikuusut

Politikkikkut arlalinnik atuuffeqarneq akuersaarneqarsinnaanngilluinnarpoq, Poul Hansen taama oqariartuuteqarpoq. 
Demokraatilli pileqqaarneranniilli arlalinnik atuuffeqartarneq naliginnaasuusoq, Demokraatit siulittaasuata Randi Vestergaard Evaldsenip akerliliilluni oqaatigaa.

Taassuma oqaatigaa, politikkerit nuimasut soorlu Per Berthelsen aamma Palle Christiansen Inatsisartuni ilaasortaajutigalugit kommunalbestyrelsini issianikuusut.

- Aallartikkattali kommunini Inatsisartunilu marlunnik atuuffeqarneq atuuttuaannarnikuuvoq, Vestergaard Evaldsen oqarpoq. 

Taassuma Nivi Olsenip Justus Hansenip namminerlu marlunnik atuuffeqarnertik ajoqutissartaqanngissoraa.

Poul Hansen nammineerluni marlunnik atuuffeqarnikuuvoq. Inatsisartuni sinniisutut sulinermini Kommuneqarfik Sermersuumi issianikuugami.

Taamatullu suliniaraanni inuit ataasiakkaat suliassat nammassinnaaneraat apeqqutaasoq Demokraatit siulittaasuat isumaqarpoq.     

- Akisussaaffiit kivinneqarsinnaatillugit marlunnik atuuffeqarsiinnaatitaanerup malinneqannginnissaa pissutissaqarsorinngilarput.

Nivi Olsen, Justus Hansen Randi Vestergaard Evaldsenilu tamarmik Demokraatit siulersuisuunerini issiapput, taamaammallu partiip iluani pissaanilerujussuullutik. Taamaattoqarneratalu partiimi ilaasortanik allanik tatiginninnginnerannik ersersitsisoq Poul Hansen isumaqarpoq. 

Partiilli siulittaasuata tamanna ilumuunnginnerarpaa, oqaatigalugulu innuttaasut kissaataat naapertorneqartoq.   

- Qineqqusaarnerup nalaani periarfissat assigiinnikuupput. Qineqqusaarnerullu nalaani qinersisartut ilisimavaat marlunnik atuuffeqalersinnaasugut. Taamaammat Inuit qinersinerat malillugu uagut akisussaaffimmik tigusilluta sulivugut, Demokraatit siulittaasuat oqarpoq. 

Taanna atuuffimmi arlaannaanniilluunniit tunuarnissamik eqqarsaateqanngilaq. 

Poul Hansen maanna partiimut allamut, tassa IA-mut, Siumumut Partii Naleqqamulluunniit nuunnissani ammaffigaa. 
Paartiillu taakku tamarmik arlalinnik atuuffeqarnermik akuersaartuupput. 

Partiit allat siulersuisuunerisa arlalinnik atuuffeqartannginnerat allaanerussutigigaat Poul Hansenip oqaatigaa.