Demokraatit: Mamianaqaaq

Mamianaqaaq. Nunarput meeqqat pisinnaatitaaffiinik unioqqutitsisutut Naalagaaffit Peqatigiinnit isigineqarmat kanngunaqaaq. Tassami Meeqqat pisinnaatitaaffii pillugit Danmark Nunarput sinnerlugu atsiornikuuvoq, Demokraatit siulittaasuat, Jens B. Frederiksen oqarpoq.
Allattoq Louise M. Kleemann
januaarip 22-at 2009 12:36

- Naalakkersuisut ukiut kingulliit ingerlaneranni periarfissaqarnikuupput ajornartorsiutit takusinnaassallugit, nassuerutigissallugit iliuuseqarfigissallugillu. Arlaannilluunniit iluaqutaasimasumik pisoqarsimanngilaq. Taamaammat annertoorujussuarmik iliuuseqartariaqarpugut. Demokraatit arlaleriarlutik siunnersuuteqartarnikuupput, assersuutigalugit meeqqat atuarfiini nerisitsineqartalissasoq, tassuunakkummi qulakkeersinnaagatsigu meeqqat minnerpaamik ullormut marloriarlutik nerisaqarnissaat. Aaamma siunnersuutiginikuuarput 100 mio. koruunit immikkoortinneqassasut meeqqat piitsuunerisa akiorniarnissaat anguniarlugu.

Aningaasat amerlanerujussuit atortariaqarpavut. Ajornartorsiut ilungersorluta isigisariaqarparput. Tulleriiaarineq apeqqutaalluinnarpoq.

- Uagut nunatsinni meeqqatta isumaginissaat akissaqartinngikkutsigu kanngunartutut inissisimavugut. Imaassanngilaq sukkanerpaamik susassaqarfiit tigoorassagivut, susassaqarfiit tigoriikkavut nakkutigisinnaanngikkutsigit.

- Naalakkersuisut isumagisariaqarpaat taamannak isiginiarneqarnerput FN-imiit akiorneqassasoq. Demokratit siulittaasuat Jens B. Frederiksen taama oqarpoq.

Nunatsinni meeqqat kaattut ikiorserniarlugit statsminister Anders Fogh Rasmussen erniinnaq iliuuseqanngippat, Dansk Folkeparti naalakkersuisut avaqqullugit amerlanerussutilinnik katersinialerput.

- Akuerisinnaanngilarput, danskisut innuttaasusillit kaallutik innartassappata, Dansk Folkepartip Kaallit Nunaannut tunngasunik oqaaseqartartua, Søren Espersen, Ritzauimut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq