Demokraatit: Mælkebøtti pisariaqarpoq
Mælkebøttip kommunemit tapersersorneqarnissaa pisariaqarluinnarpoq, taama oqarpoq Nuup kommunalbestyrelseani Demokraatit sinnerlugit ilaasortaasoq Esmar Bergstrøm. Meeqqat Nuummi sumiginnagaasartut ornittagassaata Mælkebøtten-ip aappaagu atulernissaa sulissutiginnittunit maanna aningaasassarsiuunneqaleruttorpoq.
Mælkebøtten-ip meeqqanut ornittagassanngorlugu naleqqussarneqarnissaanut aningaasanik atugassanik suliffeqarfiit suliniaqatigiiffiit assigisaallu tapiissuteqarusuttut imaaginnavipput. Kunngissakkut katinnerannut atatillugu tusarnaartitsinermit Rocken Royalemit aningaasat isertitat ilaat 1 millioni koruunit Mælkebøttip pilersinneqarnissaanut atugassat aamma ullumikkut tunniunneqarput. Mælkebøtten-ip atulernissaanut tapersersueruttoqaraluaqisoq illu atulerpat ingerlatsinermut aningaasartuutissat ukiumut 3,9 millioni kroneusussatut tagginneqartut suli matussutissaqartinneqalinngillat. Mælkebøttellu ingerlatsinermut aningaasartuutissaanut Nuup kommunea maannamut aningaasaleeqataarusunngilaq.
Taamaattorli Demokraatit kommunalbestyrelsemut ilaasortaatitaat isumaqarput kommunep tapiissuteqarnissaaperiarfissaqartoq. Demokraatit sinnerlugit Nuup kommunalbestyrelseani ilaasortaq Esmar Bergstrøm tunngavilersorpoq:
- Tapersertariaqartutut nalilerpara, taamaalilluni meeqqanik angerlarsimaffiup avataanut inissitsisarnermi aningaasat atorneqartartut pinaveersaartitsinermut atorneqarsinnaalissammata. Siunnersuutigaara kommunep suliniuteqarfiini arfineq marluusunit, ukiumut aningaasat atunngitsuukkat Mælkebøtten-imut tapiissutigineqarsinnaagaluartut, Esmar Bergstrøm oqarpoq, oqaatigaalu siunnersuutini tamanna kommunalbestyrelsemit suli isummerfigineqanngitsoq.
Danmarkimi Redbarnet-ip pisortaata Mimi Jacobsen-ip neriuutiginerarpaa Mælkebøtten-ip atuleruni ingerlatsinermut aningaasartuutissaanut Nuup Kommunea tapissuteqarumaartoq. Suliniut Red Barnettip ingerlassinnaanngilaa, kisianni neriuppugut tamanna Nuup kommuneani suleqatigiilluarnikkut aaqqinneqarsinnaajumaartoq, Mimi Jacobsen radioaviisimut taama oqarpoq.
Nuup kommunea Mælkebøtten-ip ingerlatsinermut aningaasartuutissaanut tapiissuteqarsinnaanissaa pillugu borgmester Agnethe Davidsen ulloqeqqanut radioaviisimi oqaaseqartinniaraluaratsigu iluatsinngitsoorparput.
