Partiit isornartorsiuisut mittarfinnut nutaanut akerliupput, uangalu isumaqarpunga naalakkersuisumik uppisitsinikkut suliamik unitsitsiniartut. Taamaaliorsinnaatinneqassanngitsut isumaqarpunga , Nivi Olsen oqarpoq.Assi: KNR

Demokraatit Karl Frederik Danielsen asattuuppaat: Eqqissilluni sulinissaminik periarfissinneqartariaqarsoraarput

Demokraatit tatiginninnginneq naveersinerluunniit tusarusunngilaat. Karl Frederik Danielsen suliaqarluartoq, Demokraatit siulittaasorigallagaat, Nivi Olsen isumaqarpoq.

Naak Inuit Ataqatigiit, Suleqatigiissitsisut Partii Naleqqallu Naalakkersuisoq Karl Frederik Danielsen (S) naalakkersuisuujunnaartikkusukkaluaraat Naalakkersuisoq atuuffeqarnermini aarlerinartorsiunngilaq.

Demokraatimmi ineqarnermut, attaveqaqatigiinnermullu naalakkersuisoq asattuukkaat naalakkersuisooqatigiit tapersersortaanni siulittaasuugallartup, Nivi Olsenip oqaatigaa.

- Illuatungiliuttut naalakkersuisumik tunngavissaqarpallaarnatik uppisitsiniaapput, Nivi Olsen KNR-imut oqarpoq.

AAMMA ATUARUK Naleraq: Karl Frederik Danielsenimut tatiginninngilagut

- Karl Frederik Danielsen sulilluarpoq, sulinermini eqqissisimatinneqartariaqarpoq, pissutigalugu susassaqarfiani mittarfinnut pilersaarutit ilanngullugit suliassarpassuaqarpoq. Nunatsinni pilersaarutini annerpaavoq, illuatungiliuttulli pilersaarummi tassani arriillisaanatik sulissitiginnikkusupput, Nivi Olsen oqarpoq.

Naaggaarniarluni angertoq

Karl Frederik Danielsenip Illersornissap Kangerlussuarmik atuiinnarnissaanut atatillugu tusagassiortunik katersortitsinermi kukkusumik paasissutisseereernerani isornartorsiuinerit imaaginnaipput. Matumani Kangerlussuup Illersornissaqarfimmik atuiinnarnissaanut tunngatillugu tusagassiortunik katersortitsinermi Illersornissaqarfiup mittarfiup ingerlanneqarneranut iluarsartuunnissaanullu akiliisuunissaanut saqqummersinneqanngitsumik isumaqatigiissuteqarnersoq, Karl Frederik Danielsen KNR-ip aperimmani angerluni akissuteqarpoq.

Angerneq kingunitsianngua naagganngortippaa, taama ittumimmi isumaqatigiissuteqanngilaq.

Tamannalu tunngavigalugu Partii Naleraq Karl Frederik Danielsenimut tatiginninnginnermik ullumi oqaaseqarpoq, Karl Frederik Danielsenilu taarserneqanngippat mittarfiit pillugit novembarip 12-iani inatsisartuni oqallisiginnittoqannginnerani tatiginninnginnissamik siunnersuuteqarniarluni.

AAMMA ATUARUK Paatsiveerutsitseqaaq: Angerpoq – naaggaarniarsimagaluarlunili

Inuit Ataqatigiinni siulittaasup tullia, Aqqaluaq B. Egede Karl Frederik Danielsenimut aamma isornartorsiueqataavoq.

- Ineqarnermut Attaveqatigiinnermullu Naalakkersuisoq ataasiaannarani imminut assortuuttunik nalunaaruteqartarpoq. Tusagassiorfitsigut saqqummiussat, naalakkersuinikkullu Inatsisartunut saqqummiussat eqqunngitsut sulinitsinnut aalajangersaaniarnitsinnullu nalornilersitsisut tulleriiaaginnavipput, Inuit Ataqatigiit siulittaasuata tullia, Aqqaluaq B. Egede oqarpoq.

Suleqatigiissitsisuneersoq Tillie Martinussen aamma nuannaanngivippoq:

- Assuarinnittoqartariaqarpoq soraarsitsisoqarluniluunniit, taanna Kangerlussuarmut apeqqummut tunngatillugu qisuariaateqarluni tusagassiutinut nalunaarummi allappoq.

Mittarfinnut akerliuinnartut

Demokraatilli tatiginninnginnermik naveersinermilluunniit tusagaqarusunngillat.

- Karl Frederik Danielsenip nalunaarutiginninnini aaqqereerpaa, oqaatigineqartussarlu oqaatigaa. Taamaammat tunngavissaqarpiarani naalakkersuisumik uppisitsisoqarsinnaanngitsoq isumaqarpunga, Nivi Olsen oqarpoq.

Karl Frederik Danielsen allani paasissutissanik akerliusunik aamma oqaaseqarnerarneqarpoq. Isornartorsiuineq tamanna qanoq oqaaseqarfigaajuk?

- Partiit isornartorsiuisut mittarfinnut nutaanut akerliupput, uangalu isumaqarpunga naalakkersuisumik uppisitsinikkut suliamik unitsitsiniartut. Taamaaliorsinnaatinneqassanngitsut isumaqarpunga , Nivi Olsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat