Demokraatit: Isumaqatigiinniat isasooriaannaapput

Siumut Atassut IA-llu sulieqatigiilernissaat piviusunngussappat atangaarnavianngitsut Demokraatit isumaqarput.

Demokraatit isumaqarput IA-p pissusilersornera tatiginanngilluinnartoq, ukiullu pingasut matuma siorna pisimasut uterneqaqqiinnartut, Demokraatit siulittaasuat Per Berthelsen oqarpoq.

- Inuup tassuma pissusilersornerata takutiinnarpaa tatiginanngilluinnarnera, tamanna uagut niaqorluutiginianngilarput. Ukiut pingasut matuma siorna oqaatigisani ippassaq aniseqqiinnarpaa, tassa qineqqusaarnermigooq oqaaserineqartut isumaqatigiinniarnerni atorunnaartarput, taava qineqqusaarnermi oqaaserineqartut sumiilerpat? Demokraatit siulittaasuat Per Berthelsen oqarpoq nangillunilu:- Neriusaamik taallugu Naalakkersuisooqatigiiliorniarsarineq sumilluunniit perarfissinneqanngilaq. Josef Motzfeldt-ip mattuppaa, Atassummut saaffiginnissinnaaneq kinguarsartuarlugu, utaqqiniarlugu Atassutip siumukkunnik isumaqatiginninniarnerata qanoq kinguneqarnissaa takuniarlugu.

Demokraatit Atassut IA-llu nutaaliorniarnermik siunertalimmik isumaqatigiinniarnissaat aallarterianngitsoorsimavoq, maannakkullu Siumup Atassutip IA-llu suleqatigiinniarsarilernerat piviusunngussappat isasooriaannaasoq Demokraatit isumaqarput.

- maanna eqimatta assigiinngitsorujussuarnik isumaqartut, puullaaqinerujussuarmik imaqartut isumaqatiginninniartussaapput, isumaqatigiissappatalu qaqugukkulluunniit isasooriaannaapput.

Taama oqarpoq Demokraatit siulittaasuat Per Berthelsen.

Demokraatit illuatungiliuttuunissartik piareersimaffiginerarpaat.