Demokraatit: Isumalioqatigiissitaq suliakkerneqassanngilaq

Nunatta Danmarkimut 1953-imi ilanngutsinneqarneranut atatillugu danskit Naalagaaffiit Peqatigiinnut eqqunngitsumik paasissutissiisarsimanerat pillugu Atlantikup avannaani qinikkat suleqatigiiffiata namminersorneq pillugu ataatsimoortumik isumalioqatigissitaq akuerineqassanngitsoq, Demokraatit isumaqarput. Isumalioqatigiissitami sulineq pereersunit unissarneqassanngilaq, nunarpulli savalimmiut Danmarkilu sinnerlugu folketingimi ilaasortat toqqagaannik inatsisilerituunik sulisoqarluni misissuisussamik nutaamik pilersitsisoqassasoq, Demokraatit siulittaasuat Per Berthelsen oqarpoq.

-Oqariartuuterput unaaginnarpoq: Namminersorneq Pillugu Isumalioqatigiissitami siunissaq isigalugu suliakkerneqarsimasumi, kingumut annertuumik qiviarluni suliassanik akoorneqassanngitsoq. Taammaattumillu siunnersuutigaarput qulaajaanissaq pisullu uteqqinnginnissaat qulakkeerniarlugu suleqatigiissitamik avataatigut pilersitsisoqassasoq, folketingimi ilaasortaatitaasut aallartitaqarfigisaannik inatsisilerituunik suleqateqarlutik nalilersuisussanik.

Per Berthelsen-ip ernummatiginerarpaa isumalioqatigiissitat suliakkerneqassappata, tamanna avissaartuunnermik kinguneqassasoq.

- Tamanna pissaaq kingumut qiviarnerit siunissaq eqqarsaatigalugu suliniarnermut naalleraasussanngorlugit ikkunneqarpata.

Per Berthelsen aamma oqarpoq naalakkersuisut siulittaasuata isummaminik allanngortitsinera Demokraatinit qasunartorujussuartut nalilerneqartoq.

Kattusseqatigiit allatut isumaqarput.

Namminersorneq pillugu isumalioqatigiissitat nunatta Danmarkimut ilanngutsinneqarnerani danskit eqqunngitsumik paasissutissiisarsimanerat isumalioqatigiissitani suliarineqartariaqartoq.

- Paasissutissat pisariaqartut tamarmik nalilersuinermi ilaatinneqartariaqarput, Kattusseqatigiit siulittaasua Anthon Frederiksen oqarpoq.

Naalakkersuisullu siulittaasuata suliakkiinissamik piumasaqarnermut atatillugu allatut massakkut isummernera Kattusseqatigiit toqqissimanartinngikkaat Anthon Frederiksen oqarpoq.

- Matumani naalakkersuisut siulittaasuata tutsuiginassusia apeqquserparput, ullormiit ullormut isummaminik allanngortitseriataarpoq, tassanilu paasinarpoq naalakkersuisuutitani aqussinnaanngikkai.

Aammattaaq Inatsisartut suliamut tunngatillugu qanimut malinnaatinneqartariaqartut Anthon Frederiksen isumaqarpoq.

Naalakkersuisooqatigiinnut illuatungiliuttut allat Atassutikkut matumani sammineqartumut oqaaseqartinniaraluaratsigit iluatsinngitsoorparput.