Demokraatit: Innarluutilinnut naleqqussagaanngitsut arlaqarput
Innarluutillit innuttaaqataasutulli allatut pisinnaatitaaffeqarnerat pillugu, Demokraatit inatsisartut ukiaq-manna ataatsimiinnerannut atatillugu aalajangiivigisassamik siunnersuuteqarput.
Tassani Naalakkersuisut peqquneqassapput, inatsisartut 2008-mi upernaakkut ataatsimiinnerminnut atatillugu nalunaarusiussasut.
Nalunaarut pisortat ingerlataanni sanaartukkat innarluutillit iserfigisinnaasaasa atortorissaarutillu atorsinnaasaasa ullumikkut qanoq innerannik paasissutissiissaaq. Assersuutitut taaneqarput oqaluffiit, atuarfiit, timersortarfiit kommunit aamma Namminersornerullutik Oqartussat ingerlataat.
Peqqussutit atuuttut malillugit sanaartukkat atortorissaarutillu kikkunnit tamanit, aamma innarluutilinnit atorneqarsinnaasunngorlugit aaqqissuunneqarsimasussaatitaapput.
Inatsisartut aalajangiivigisassaattut siunnersuut oktobarip ulluisa 23-ianni oqaluuserineqassaaq.