Demokraatit: Innarluutilinnut naleqqussagaanngitsut arlaqarput

Kommunit sorliit isaariaat atuakkanillu atorniartarfiit isaariaat sumiittut innarluutilinnut assakaasulinnik issiavilinnut suli iserfigiuminarsarneqanngillat, sumiittut suli innarluutillit perusuersartarfilerneqanngillat, sumilu suli majuartaatiliisoqanngila? Apeqqutit taakku Demokraatit naalakkersuisunut apeqqutigaat.
oktobarip 11-at 2007 12:16

Innarluutillit innuttaaqataasutulli allatut pisinnaatitaaffeqarnerat pillugu, Demokraatit inatsisartut ukiaq-manna ataatsimiinnerannut atatillugu aalajangiivigisassamik siunnersuuteqarput.

Tassani Naalakkersuisut peqquneqassapput, inatsisartut 2008-mi upernaakkut ataatsimiinnerminnut atatillugu nalunaarusiussasut.

Nalunaarut pisortat ingerlataanni sanaartukkat innarluutillit iserfigisinnaasaasa atortorissaarutillu atorsinnaasaasa ullumikkut qanoq innerannik paasissutissiissaaq. Assersuutitut taaneqarput oqaluffiit, atuarfiit, timersortarfiit kommunit aamma Namminersornerullutik Oqartussat ingerlataat.

Peqqussutit atuuttut malillugit sanaartukkat atortorissaarutillu kikkunnit tamanit, aamma innarluutilinnit atorneqarsinnaasunngorlugit aaqqissuunneqarsimasussaatitaapput.

Inatsisartut aalajangiivigisassaattut siunnersuut oktobarip ulluisa 23-ianni oqaluuserineqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq