Demokraatit: Inatsisartut akisussaassuseqanngitsumik iliorput

Kræftimik nappaateqartunut katsorsarneqarsinnaanngitsunut misileraataasumik katsorsartittoqarsinnaalernissaanik Inatsisartut isumaqatigiissutaat akisussaassuseqanngitsumik iliorneruvoq, taama isumaqarpoq Demokraatit siulittaasuat Per Berthelsen.
Allattoq Elisa Isaksen
marsip 16-at 2008 17:13

Demokraatit siunnersuut isumaqatiginartikkaluarlugu, isumaqatigiissummut misissuiffigeqqaarneqanngitsumut peqataarusunngillat, taamaattumik Inatsisartuni isumaqatigiissummut Demokraatit ilaanngillat.

- Uani oqartariaqarpunga partiinit siulittaasoqarfimmiititaqartunit tallimaasunit sisamat isumaqatigiimmata, una suliassaq pingaartuummat, sukumiisumik piareersariarlugu apriilip 23-anni suliarineqassasoq. Taamaalilluni partiit misissugassat misissoreerlugit oqallissinnaaniassammata.

Tassa siunnersuut aningaasaqarnermut ataatsimiititaliamit tamarmiusumit aamma aningaasaqarnermut pisortaqarfimmit itigartinneqaraluarpoq.

Kisianni tallimanngormat ataatsimiittarfimmut iseratta paasilerparput, suna tamaat avaqqutiinnarlugu naalakkersuisut inatsisartuni tunuliaqutitik pinngitsaalisimagaat, taasissutissanngorlugulu saqqummiunniarlugu. Tassami nalunnginnamikku ataasiinnarmik amerlanerussuteqarlutik oqaluuserisassanngortissinnaallugu. Naak siunnersuut Inatsisartuni ilaasortanit atuarneqarnikuunngikkaluartorluunniit.

Naak aamma missingersuusiornermut inatsimmi allassimasoqaraluartoq, aningaasanut inatsisip avataatigut aatsaat ilanngussisoqarsinnaasoq, suliassaq kinguartinneqarsinnaanngippat, pingaaruteqarluinnartuuppat imaluunniit sioqqutsisumik nalilersuiffigeqarsinnaannggippat, Per Berthelsen oqarpoq.

Isumaqatigiissummi kræftimik nappaatillit kisimik pineqaratik aamma katsorsarneqarsinnaanngitsumik nappaatillit allat pineqarput. Aaqqissuussineq erniinnaartumik atuutilerpoq, katsorsarneqarsinnaanngitsumillu napparsimasut misileraataasumik katsorsarneqarnissamut qinnuteqarsinnaalerput.