Demokraatit: Imigassamik killilersuineq unitsilli

Taamaattumik inerteqquteqarnerup unitsinneqarnissaa sakkortuumik eqqarsaatigineqartariaqarpoq, Justus Hansen oqarpoq.

-  Isumaqarpunga interteqquteqarneq arlaannaanulluunniit iluaqutaasimanngitsoq, ajornartorsiutillu illikartiinnarneqarsimasut. Soorunami politiit isumaginnittoqarfimmilu sulisut matusineq nuannaarutigisimassagaluarpaat, kisianniliuna ajornartorsiutip qiterisaa aaqqissimanngilluinnaripput, Justus Hansen oqarpoq.

Matusisimaneq taamani kommunalbestyrelsiusimasup kissaateqarnerata kinguerisimavaa. Matusinerinnarli kisimi attanneqarsinnaanngilaq. Aammattaaq imigassamik ajornartorsiuteqarneq akiorniarlugu qitiusumiit iliuuseqartoqarsimasariaqaraluarpoq, Justus Hansen isumaqarpoq.

Inerteqquteqarneq malitseqartinneqanngilaq akerlianik kommunalbestyrelsip Tanumi innuttaasut ilaginnarpai inerteqquteqarnerlu kisiat iliuuseralugu.

Taamaattumillu suliassaq taanna kommunalbestyrelsip kisimiilluni suliariniarsarisimavaa, naak Namminersornerullutik Oqartussat Namminersorlutillu Oqartussat ikiuussimasariaqaraluartut, Justus Hansen oqarpoq.

-  Qujanartumilli kommunalbestyrelsimi inerteqquteqarneq pillugu suliniutinik arlaqartunik aallartitsisimavugut. Ilaqutariinnut angerlarsimaffiliorsimavugut ilaqutariinnillu siunnersuisumik perorsaanermillu suliniutinik aallartitsisimalluta. Ksianni tamanna naammassimanngilaq, imigassanik kimittuunik tuniniaanerup ammaqqinneqarnissaa eqqarsaatigisariaqalerparput.

Tunumi imigassanik kimittuunik tuniniaanerup  ammarneqaqqinneratigut soorunalimi imigassamik atuineq annertuseriartussaassaaq, Justus Hansenili isumaqarpoq tamanna sivikitsuinnaajumaartoq. Tassami uani qitiunerpaajuvoq Tnumi innuttaasut Kitaamiusulli assigiimmik pineqarnissaat.

Inerteqquteqarneq atorunnaarsinneqassappat  Tunumiut Kitaamiusulli naleqartigalutik misigisimalissapput. Sooq allaanerusumik pineqassaagut. Taamatut inunnik immikkoortitsineq paasisinnaanngilluinnarpara, Justus Hansen oqarpoq, naqissuserlugulu Tunumi imigassanik kimittuunik inerteqquteqarnissamut aalajangeqqaarsimaneq Kitaamiut Tunumiuniit imminnut naleqarnerusutut misiginerannik tunngaveqarsimasoq.