Demokraatit iluminni isumaqatigiinngillat
Suliffeqarfiit kikkunnik atorfinitsitsissanerlutik nammineq aalajangigassarigaat Demokraatit Inuusuttaasa ataqqinerarpaat, Jens B.-lli Inatsisartunut ilaasortaaginnarnissaminik pilersaaruteqarnera pitsaasuunngitsoq erseqqissaatigalugu, aatsitassarsiortummi inatsiliortullu attuumassuteqanngilluinnartuusariaqarsorigamikkit.
-Aatsitassarsiornermut Nunatta siunissaanut taama pingaaruteqartigisumut tunngatillugu Inatsisartunut ilaasortat attuumavallaarsinnaanerat apeqquserneqartussaanngilaq. Aamma Jens B. Frederiksen suliani True North Gems Greenlandimut attuumassuteqartuni peqataasinnaassuseqarani nalunaaraluarpalluunniit, aatsitassarsiornerup iluani atorfeqarnera ileqqorissaarnermut tunngatillugu apeqquserneqarsinnaavoq, Demokraatit Inuusuttaasa siulittaasuat siulittaasullu tulli taama isumaqarput.
Politikerit inuunerminni aalajangikkamik apeqquserneqarsinnaannginnissaannut, piviusorsiortuunissaannut akisussaassuseqartuunissaannullu pisussaaffeqarput, Demokraatillu Inuusuttaat Jens B. Frederiksen taamaliorsimannginnerarpaat.
-Apeqquserneqarsinnaanngitsumik ingerlatsisoqarnissaa kissaatigaarput - inuiaqatigiinnit tatigineqarsinnaasariaqarpugut, tamanna aamma Inatsisartunut ilaasortanut atuupoq. Demokraatit Nunatsinni politikkikkut pisunik siussuertutut inissisimanertik tulluusimaarutigaat, Demokraatillu Inuusuttaasa ileqqoq taanna ingerlatiinnarusuppaat.
