Demokraatit ikileqqipput

Demokraatit Nunatsinni immikkoortortaqarfiini ilaasortat ikiligaluttuinnarput. Maanna aamma Qasigiannguani Demokraatit immikkoortortaqarfiani siulersuisut kommunalbestyrelsemilu ilaasortaq nalunaarput Demokraatiniit tunuarlutik.

Uumasunik illersuinissamut soqutigisalik Thor Hjarsen, Demokraatit sinnerlugit NAMMCO-p ataatsimeersuartitsinissaanut ilaatinneqarniarmat, Qasigiannguani Demokraatit akerliullutik Demokraatiniit tunuarput.

- Inatsartuni ilaasortat nammineerlutik suliassartik suliarisussaavaat, allanik nassiussuinatik, Mads Peter Grønvold, Qasigiannguani Demokraatiniit tunuartoq oqarpoq.

Siornatigut Mads Peter Grønvold Attaviittut Kattusseqatigiinni ilaasortaasinnarluni Demokraatinut ilanngukkaluarpoq, maannalu attaviittutut inisseqqilluni.

Demokraatit siulittaasuat Per Berthelsen oqarpoq nungusaataanngitsumik piniartarneq demokraatinit pingaartinneqartoq.

- Partiip malittarisassaani ersilluinnartumik allaqqavoq nungusaataanngitsumik nunatta pissarititaanik atuinissaq partiip pingaartikkaa Per Berthelsen oqarpoq nangillunilu; - Tamanna aamma Mads Peter Grønvold-ip aallaqqaataaniilli ilisimavaa. Soorunami taamatut pisoqarnera ajuusaarnarpoq, kisianni illoqarfittut namminerlu soqutigisat aallaavigalugit isummerniarsarinerit uniffiginavianngilagut, partiittami malittarisassai pingaartinneruagut, Per Berthelsen oqarpoq.

Nungusaataanngitsumik piniartarnissaq Demokraatit soqutigisaraat, aaliangiusimallugillu. Ilaasortat aamma ikilissagaluarpataluunniit, Demokraatit tusagassiutinut allakkaminni taama naggasiipput.

Qaammatip uuma ingerlanerani Qeqertarsuarmi Demokraatit siulersuisui aamma partiiminnit tunuarput.