Demokraatit: Hans Enoksen pissaanermik atornerluivoq

Jens B Frederiksen isumaqarpoq, partiimut Siumumut illersuisoq Hans Enoksenimit aqutsisussatut toqqarneqarsimasoq.

Ataatsimiinnermilu nipangersinneqartarsimanini partiip Siumup pissaanermik atornerluineranik takussutissiinerarpaa, tassamigooq Hans Enoksen ataatsimiinnermi nammineq iluarisaminik oqalutsinneqartarsimammat.

Kikkut tamat oqartussaanerat malillugu ataatsimiinneq ingerlanneqarsimannginnerarlugu Jens B. Frederiksen oqarpoq.

Jens B. Frederiksenip naammagittaalliutaa pillugu Hans Enoksen ima oqarpoq:

- Naluara pissaanermik atornerluisoqarnersoq. Soorunami ataatsimiinermi aqutsisussaqarnersoq qulakkeerusuppara. Aqutsisussaqanngippat piareersimanerarluni nalunaartoq ataatsimiinermi aqutsivoq, tamannalu akuleruffigineqanngilaq, Hans Enoksen oqarpoq.

Politikkikkut ilissinnut qaninnerummat taanna toqqarsimaviusiuk?

- Taamaattoqanngilaq! Oqareerpunga, aqutsisussatut piareersimanerartoq aqutsivoq, tamannalu naammassivaa, akuleruffigineqanngivippoq,Hans Enoksen oqarpoq.

- Apeqqutaanngivippoq politikkimi sumiinnersoq, ima apeqqutaanngitsigivoq illuatungiliuttunut allaat tamaasa qaaqquavut, naalakkersuisoqarfitta ataani suliassaq ingerlanneqartussaammat, tamaasalu akiliullugit angalatillugit, Hans Enoksen oqarpoq.

Politikkikkut isumaqatigisamik toqqaanertut isigineqarpoq, nipangersaasarneralu ippigineqarluni

- Tamatta ilisimatinneqaqattaarpugut naatsumik ersarissumik oqaaseqartassasugut, uagut taanna sapinngisamik malinniarsimavarput.

Aamma peqataasut ilai nipangersinneqartaramik, immaqa tassunga sangutinniarsarivaat, Hans Enoksen oqarpoq.

Namminersorneq pillugu innuttaasunik ataatsimiititsineq sapaatiummat ingerlanneqarmat, Jakob Kruse aqutsisutut ingerlatsivoq.