Assi: Jonas Løvschall-Wedel/KNR

Demokraatit Folketingimut sassartitassaminnik saqqummiussisut

Demokraatit - partiini kingullersaallutik - Folketingimut sassartitassaminnik saqqummiussaqarput.

Folketingimut juunip ulluisa tallimaanni qinersinissamut Inatsisartuni partiini Demokraatit kisiartaallutik qinigassanngortitaminnik nalunaaruteqanngillat.

Kisianni massakkut partiip Inatsisartunut ilaasortaasa ilaat Nivi Olsen Facebookimini nalunaarpoq partii sinnerlugu qinigassanngortittut ilagigaanni.

- Folketingimut qinigassanngortippunga sammisamalu pingaarnersaat tassaavoq meeqqat, Nivi Olsen allappoq.

- Meeqqanik atornerluineq isumakkeerfigineqarsinnaanngilaq unitsittariaqarlunilu! Meeqqavut nunatta pingaarnersaatut isumalluutigai. Atornerluinerup unitsinneqarnissaanut alloriarneq pingaartoq tassaavoq ullumimiit sakkortunerujussuarmik pineqaatissiisarneq, Nivi Olsen siunnersuuteqarpoq.

AAMMA ATUARUK Folketingimut sassartut maannamut 15-iusut

- Ilumoorsinnaanngilaq meeqqamik atornerluisimasoq qaammatialunnguaannaat Pineqaatissinneqarsimasunut Inissiisarfimmeereerluni aqqusinermi naapinneqarsinnaasoq. Tamanna qanoq iliorfiginiarpara! Taamaallaat sakkortunerusumik pineqaatissinneqarnissaat Folketingimi sulissutigisinnaavara, Nivi Olsenip Facebookimi nittartagaani atuarneqarsinnaavoq.

Folketingimut juunip tallimaani qinersisoqassaaq.


 

Isummersuutit

#FQ2019

Aaja Chemnitz Larsen, folketingskandidat for Inuit Ataqatigiit, afgiver sin stemme til Folketingsvalget i Godthåbshallen i Nuuk. Foto: Christian Sølbeck. (Foto: Christian Klindt Sølbeck/Ritzau Scanpix)

LIVE: Aki Mathilda Høegh Dam aamma Aaja Chemnitz Larsen Folketingimut qinigaapput