Demokraatit ataatsimiitialiani amerlanerni ilaasortaarusupput

- Teknikkikkut suleqatiilerpugut partiitut pittutugaanata,  taamaalilluta nammineerluta politikkut ingerlatagut ingerlatissavagut,  Jens B. Frederiksen oqarpoq,  - Aleqa Hammond-imut erseqqissaatigivarput pisarnertut uparuagassaqaraangat Demokraatit uparuaasarniarput.

Jens B. Frederiksen  demokraatit Naalakkersuisunik Parti Inuillu teknikkikkut suleqatigiinissaanik isumaqatigiissuteqarnerup kingorna taama oqarpoq.

Taassuma qinersisartuni eqqissisarpai inuiaqatigiinni uparuagassaqaraangat uparuaasarniarlutik. 

Qanitanik nalunngisanik kammlaatinillu salliutitsisoqarpat demokraatit  sakkortuumik qisuariartarniarlutik oqarput, soorluttaaq demokraatit isumatik malillugit inatsisartuni taasisarniarput. 

- Uparuaasarnerput attatiinnassavarput  aamma siunissami, demokraatit siulittaasuat oqarpoq. - Politikkikkut isumaqatigiinnerunngilaq, teknikkikkut isumaqatigiissutaavoq, taamaaliornikkut inuiaqatigiinni sunneeqataanissaq annertusarneqarluni, Jens B. Frederiksen oqarpoq.

Ungasinnerusoq eqqarsaatigalugu inatsisartuni aatsitassanut ataatsimiititaliami  amerlanerusunik ilaasortaatitaqalerpat  Demorkraatit ilaasortaatitaqalernissaat naatsorsuutigineqarpoq.

Demokraatit ataatsimiititaliani ilaasortaatitaqarnermikkut politikikkut suliunitiminnik angusarnerussasut Jens B. Freriksen isumaqarpoq

Inatsisartut ataatsimiititaliaanni sulinermi ammanerunissaq demokraatit kissaatigaat,  tamannalu teknikkikkut suleqatigiinnissamut piumasaqaataasimalluni. Demokraatit inatsiseqarnermut kukkunersinermullu ataatsimiititaliami ilaasortaatitaqarput

Inatsisartut ataatsimiititaliaanni, tassalu inuussutissarsiornermut - sanaartornermut - ilaqutariinnermullu ataatsimititaliani Demokraatit ilaasortaatitaqalissapput.

Inatsisartuni illuatungiliuttutt naalakkersersuillu imminnut ungasipallaarnerat qaangerniarlugu demokraatit teknikkikkut suleqatigiiinissamut isumaqatigiissuteqarput.

 -Demokraatit ataatsimiititaliani amerlanerusuni ilaasortaatitaqarnermikkut sulissutiginiarpaat inatsisartuni partiit tamarmik aalajangeeqatigiittarnissat, soorlu uran pillugu taasitsinermi partiit illuatungeriit imminnut ungasittut, tamannalu pinaveersaarniarlugu Demokraatit qeqqanut inissikkusupput, demokraatit politikkikkut anguniagaaat taamatullu suleqatigiinneq annertusarneqassammat, Demokraatit siulittaasuat Jens B. Frederiksen taama oqarpoq.