Demokraatit ataatsimeersuarnerminni piujuaannartitsinissaq eqqartugaanut ilaavoq

Piujuaannartitsinissaq tunngavigalugu piniartoqartarnissaanik Demokraatit anguniagaat akerliuffigalugit Demokraatit immikkoortortaqarfii marluk januaarimi matupput. Demokraatit nuna tamakkerlugu peqataaffigineqartumit ippassaq ataatsimeersuarput, Demokraatillu piujuaannartitsinissaq pillugu isumaqatigiissimasut partiimi siulittaasunngoqqittup Per Berthelsenip ima oqaatigaa.

-Isumaqarnerput allanngunngisaannarnikuuvoq. Immikkoortortaqarfiit namminneq unissimanngippata uagut qinnuigisimassagaluarpagut uneqqullugit, Per Berthelsen oqarpoq.

Demokraatit inatsisartut uppernaakkut ataatsimiinnissaanni aamma sunniuteqarluassangapput.

-Kialluunniit mmalinnaasup maluginngitsoorsinnaanngilaa Demokraatit oqallinermi peqataajuaannarmata. Aamma upernaakkut ataatsimiinnissami Demokraatit oqallinnermi peqataanerat maluginiarneqartussaassaaq. Massakkummi oqaluuserisassat piareerneqarneranni takuneqarsinnaavoq Demokraatit pingajorarterutingajai Demokratininngaanneersut, Per Berthelsen oqarpoq.

Demokraatit kalaalinngorsaaneq ataatsimeersuarnermi aamma eqqartorsimavaat.

-Ajuusaarutigalugu malugaarput kalaalinngorsaanermik oqalunneq kalaaliunermik kalaallisullu oqaluttunermik annertuallaartumik aallaaveqarmat. Kajungerinngilarput nunarput kalaaliinnarnik aqunneqarnissaa aallaaveqassasoq. Uagutsinnut pingaarnerpaavoq ilinniagaqarnikkut angummassinnaaneq ilutigalugu tikisitat ingerlaavartumik taarsersornissaat pinissaa, nunarsuarmullu ammasumik tikilluaqquserpaluttumillu aallaaveqartumik, Per Berthelsen oqarpoq.

Demokraatit politikkikkut anguniagaat ataatsimeersuareernerup kingorna partiip iluani oqallissigineqarput.