Randi Vestergaard EvaldsenAssi: Jonas Fievé/KNR

Demokraatit arsaq Asii Chemnitzimut utertikkaat: Taannaana aallartittoq

Kommuneqarfik Sermersuumi borgmesteri Demokraatinit sakkortuumik isornartorsiorneqareerluni ullaaq manna tunuarpoq. Demokraatit Inuit Ataqatigiinnik suleqateqarnertik sapaatit akunnerata siuliani unitsippaat akerleriinnerlu suli piujuarsinnarpoq.

Kommuneqarfik Sermersuumi borgmesteriujunnaartup borgmesterimullu tullersortaasimasup akerleriinnerat suli piujuarsinnarpoq, taamaattoqarneranilu kommuni politikkikkut siulersorneqanngilaq.

Illuatungeriillu politikkikkullu sulinerup salliutinneqarnissaat isumaqatigiissutigigaluarlugu maanna akerleriinneq arlaataluunniit akisussaaffigiumanngilaa.

AAMMA ATUARUK Asii Chemnitz Narup  trækker sig som borgmester

- Isumaqarpunga arsaq Asii Chemnitz Narupimut uterteqqinneqartariaqartoq, taannaammammi Facebookkikkut allagaqarluni aallartitsisuusoq, tassani meeqqat salliutinnagit partiini salliutimmagu, Randi Vestergaard Evaldsen, kommunalbestyrelsimi ilaasortaasoq Demokraatinilu siulittaasuugallartoq taama oqarpoq. Taanna borgmesterip tulliata siullertut sisamanngormat tunuarpoq.

AAMMA ATUARUK Demokraatit suleqataajunnaarput


Asii Chemnitz Narupip (IA) borgmesteritut marlunngornermi ullaakkut tunuarnerata kingorna taama akissuteqarpoq.
Demokraatit politikkikkut qinngasaarinerat, akornusersuinerat kommunalbestyrelsillu sulinerani akerlilersuinerat tunuarnerminut ilaatigut tunngavilersuutigaa.

IA anneruniartoq

Asii Chemnitz Narupillu borgmesteritut ingerlaqqikkusukkunnaarnerminut kommunimi politikkikkut sulinermut nammineq akornutaajumannginnini tunngavilersuutigaa.

Borgmesterilli inuttaa kisiat pineqanngitsoq, Randi Vestergaard Evaldsenip erseqqissaatigaa.

AAMMA ATUARUK IA Demokraatillu imminnut pisuuteqattaatilersut

- Erseqqissarusuppara Asiimut inuttaanut tunngassuteqanngimmat, taamatut isumaqaraluartoq. Kisianni uani Inuit Ataqatigiit suleqatigiinnermut imaluunniit suleqatiginninniarnermut tunngavigisartagaat tassani aporfiusorujussuupput. Uagutsinnut ersarissorujussuanngorsimavoq kikkut angisuujunersut kikkullu mikisuunersut. Taannalu aamma ersarissaatigiuartarpaat. Tassanilu ilaatigut anginertik uagutsinnut atorluartarpaat ersarissarlugulu angisuujunertik uagullu mikusuujunerput, Randi Vestergaard Evaldsen oqarpoq.

Nuuk Imermullu siulersuisunik toqqaasoqartussanngornera assersuutitut taava. Demokraatit akerliugaluartut Kuupik Kleist siulersuisunut toqqarneqarmat.  

- Taamani erseqqissumik oqarfigineqarpugut: Uagut anginerunerput eqqaamasariaqarparsi, Randi Vestergaard Evaldsen taama oqarpoq. 

Demokraatillu tamanna akuersaarsinnaanngikkaat, borgmesterimut tullersortaasimasoq oqarpoq.

- Kisianni uagut Demokraatininngaanniit tamakkua akuersaartuunnginnatsigit. Qinersisartugut pillugit sunniuteqaqataarusuppugut.

 

Nammineq borgmesterinngorniarniannginnerartoq

Kommunalbestyrelsi ullumikkut kingusinnerusukkut ataatsimiittussaavoq, kommunimilu siunissami suleqatigiinnerup qanoq isikkoqarnissaa oqaluuserineqassaaq.   

- Demokraatinit akisussaaffimmik tigusinissarput ersiginngilarput aamma qunuginngilarput, Randi Vestergaard Evaldsen oqarpoq.

Partiini borgmesterissatut piukkussaqarnersoq oqaatigisinnaannginnerarpaa, namminerlu piukkoorani aamma oqaatigalugu.

- Ullumikkut qanoq pisoqassanersoq takussavarput. Erseqqissaatigissavarali ullumikkut marluinnarnik issiatitaqaratta.

Kommunip Naalakkersuisunit nakkutigineqalernissaa Demokraatinit tapersersorneqanngitsoq Randi Vestergaard Evaldsenip KNR-imut oqaatigaa.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat