Demokraatit: Amigartoorneq kinguneqartariaqarpoq

Allattoq Mads Lynge
septembarip 22-at 2006 11:17

KNI-p 75 million koruuninik amigartooruteqarnera akisussaasunut kinguneqartinneqartariaqartoq, Demokraatit isumaqarput. Amigartoornermut ilaatigut pissutaatinneqarpoq, Arctic Green Foodip aningaasartuutaasa 28 million koruuningajannik matussuserneqarsimanerat.

KNI-p siulersuisui januaarimi taarserput, ilaatigut Arctic Green Foodip aningaasatigut inissisimanera pissutaalluni. Maannalu ukiup affaata ingerlanerinnaani 75 million koruuninik amigartooruteqarsinnaammat tupigusuutigaat.

- Qanoq isillunerpiaq taama ingasatsigisumik ineriartorneq ingerlasinnaava aqqutaanilu akuliuttoqarnani. Demokraatit sinnerlugit Marie Fleischer tusagassiutinut taama allagaqarpoq.

Taamaattumik KNI-mi siulersuisut qinnuigaat, akisussaaffimmik inisseeqqullugit, inissiisinnaanngippatalu Naalakkersuisut inissiisariaqartut Demokraatit isumaqarput.

Akisussaaffimmik inissiisoqarnissaanik kissaateqarnerminni KNI-p pisortaata Gerhardt Petersenip aamma Arctic Green Foodip pisortaata Tønnes Berthelsenip soraarsinneqarnissaat kissaatiginerlugu Marie Fleischerip oqaaseqarfigiumanngilaa.