Demokraatit akerliussutsimik takutitsissapput

Demokraatit akerliussutsimik Nuummi tallimanngorpat maajip ulluisa 19-ianni takutitsinissamut aggersaapput.

Partiit illuatungiliuttut aningaasarpassuarnik tapiiffigineqartalernissamik oqalunnerat Demokraatit iluarinngilaat, taamaammat aningaasarsiat qaffanneqarnissaannut inuit isummaminnik saqqummiussinissaat pisariaqarsoraat.

- Asasavut nunaqqativut, ilissiuku aningaasaatisi naalakkersuinikkut siuliaqartut, Siumuminngaaneersut, IA-minngaaneersut Atassumminngaaneersullu imminnut atorusukkaat. Partiit tapiissutaannik sipaaruteqarfiusinnaanermik Demokraatit siunnersuutaat, ”Arsarnerit naalakkersuisoqatigiianit” ajoraluartumik taperserneqanngilaq. Demokraatit isumaqarput, aningaasarpassuit immikkut ittumik partiit karsiinut nakkaratik, ilinniartitaanermut imaluunniit meeqqat sumiginnakkat ulluinnarni atugarisaasa pitsaanerulersinnissaannut atorneqarpata naleqqunnerpaasoq.

Demokraatit naapertorlugit illuatungiliuttut siunnersuutaat ukiumut 2 millioni koruuninik aningaasartuutaanerussaaq.

Akerliussutsimik takutitsineq tallimanngorpat nalunaaqutaq ulloqeqqaniit ataatsip tungaanut ingerlanneqassaaq, Nuummi Aqqusinersuarmi pizzaarniarfiup saavani.

Taqussersornissaq pisariaqassanngilaq, pizzanimmi akeqanngitsunik Demokraatit agguaaniarput.