Demokraatit taaguunneqarnerit pingajunngorpoq - Atassullu taaguunneqarnikinnerpaalerluni
Folketingimut marlunngornermi qinersisoqarnerani ajugaasut qinigaalluarput.
Folketingimut ilaasortat, Aki-Matilda Høegh-Damip (Siumut) aamma Aaja Chemnitzip (IA) qinigaaqqinnerisa saniatigut partii alla imminut ajugaasutut nalilerpoq.
Demokraatit Folketingemut sinniisuutitaqarnikuunngisaannarlutik ippassaq qinersinermi 3.656-nik taaguunneqarput.
Tamanna Folketinngemut qinersisarnerni kingullerni sisamani aatsaat taama partiimut pitsaatigaaq.
- Ataatsimut isigalugu Demokraatit sumiiffinni tamaavinni siuariarsimanerat maluginiarparput aamma nuannaarutigisorujussuuarput. Imminermini taanna nalilissagutsigu ajugaanertulluunniit taanneqarsinnaasoq isumaqarpunga, Anna Wangenheim KNR-mut oqarpoq.
Ajugaanertulli imminut nalilerneq partiip Folketingemut sinniisuutitaqalerneranik isumaqanngilaq. Tassami Demokraatit Inuit Ataqatigiinnit 1200-lluinnangajannik taasisikinnerugamik Folketingemut ilaasortaatitaqalinngitsooqqipput.
Pakatsisoq
Taaguussinerit ima agguataarsimapput:
Siumut 37,6 procentinit taaguunneqarpoq.
Inuit Ataqatigiit (IA) 24,6 procentinit taaguunneqarpoq.
Demokraatit 18,5 procentinit taaguunneqarpoq.
Naleraq 12,2 procentinit taaguunneqarpoq.
Atassut 3,6 procentinit taaguunneqarpoq.
Attaviitsoq Tillie Martinussen 0,9 procentinit taaguunneqarpoq.
Taamaakkaluartoq partii sinnerlugu 3500-ngajalluinnarnik taagunneqartoq nammineq angusaminik naammagisimaarinnippoq.
- Tuppallernarpoq. Nuannaarutigisorujussuuara inuit taama amerlatigisut tatiginnillutik taasimmata, Anna Wangenheim oqarpoq.
Qinersisiminut qujamasukkaluarluni amerlanerunnginnerat uggoraa.
- Soorunami immaqa uggornalaaraluarpoq isinngitsoorneq taanna, kisianni tullissaanimut nukkassaatigiinnassavarput, Anna Wangenheim oqarpoq.
Taanna Inatsisartunut aamma ilaasortaavoq.
Assi: Johasinnguaq Olsen.
Atassut: Pitsaanerusinnaagaluarpoq
Illuatungaanilu Atassummut taaguussisut 400-nik ikileriarput. Taakku Folketingemut marlunngornermi 720-nit taaguunneqarput. Taaguussinerillu amerlanerpaat partiip qinigassanngortitaanut marlunnut tassa Arnánguak Jeremiassenimut aamma Aviaq Kleistimut taaguussinerupput.
- Pitsaanerusimasinnaagaluarpoq soorunami. Qinersisitsigut taama inissinnerput takussutissivoq arlaannik aaqqiissuteqartariaqartugut, Atassutip siulittaasua, Aqqalu Jeremiassen oqarpoq.
Atassut partiini tallimani Folketingemut qinigassanngortitsisuni qinernikinnerpaavoq. Partiilli avataani qinigassanngortittoq, attaviitsoq, Tillie Martinussen, ilanngukkaanni taanna qinernikinnerpaalluni 176-nik taaguunneqarpoq.
Danmarkimi suleqatigisani aperiniaraa
Atassutip siulittaasuata qinersisimik ikilinerat allanngortikkusuppaa. Atassummillu qinersisartut amerleriarnissaat siunertalugu Danmarkimi partii suleqatertik, Venstre, qanoq periusissiaqarsinnaanerlutik tusarniarnissaa soqutigaa.
- Oqaloqateqarnissarput partiinut suleqatitsinnut assersuutigalugu Danmarkimi Venstrekkunnik tamakkuninnga qanoq partiip inerisaqqissinnaanissaanut eqqarsaatigalugu suleriaqqissinnaanissami, Aqqalu Jeremiassen oqarpoq.
Atassutip siulersuisuuneri, qinikkallu partiimut sinniisuusut sapaatit akunnerata naaneranni ataatsimiissapput. Tassani qinersineq nalilersorneqarluni partiip qanoq iliorluni siuariartorsinnaanissaa eqqartorneqassaaq.