Demokraatit ajuallaqqapput

Namminersorneq pillugu isumalioqatigiissitami ilaasortat nutaat inissinneqareersullu, Demokraatit saneqqutiinnarneqartutut misigisimapput.

Kalaallit danskillu namminiilivinnissamut ataatsimiititaliaat, Inatsisartuni partiinit tamanit ilaasortaaffigineqalersoq ataatsimiittaleqqippoq, Jonathan Motzfeldt Christian Mejdahl-ilu siulittaasoralugit.

Kattusseqatigiit Partiiat annertunerusumik ataatsimiititaliami sunniisinnaanngikkaluartoq, taamaattoq partiit tamat ilaasortaatitaqartinniarlugit Siumup ataatsimiititaliami inissaq ataaseq Kattusseqatigiit Partiiata siulittaasuannut Anthon Frederiksen-imut tunniuppaa.

Illuatungaagut Demokraatit sianiinaarneqarsoripput. Partiip siulittaasua Per Berthelsen kisimiilluni ilaasortanngorpoq, Inatsisartunili partiit annersaata tulliatut pissusissamisoorsoraat inissanik marlunnik pigunik.

Namminersornerullutik Oqartussat pisortaata Kaj Kleist-ip qinersinermi taasinerit tunngavigalugit inissat tallimat agguaanneqarsimanerarpai. Siulittaasoq, danskillu inatsisartuinut ilaasortat marluk inissanik agguaassinermi ilaatinneqanngillat.

-Namminersulernialeratta inissitsiterinerup assinganik suleriaaseqarpugut, pisortaaneq Kaj Kleist oqarpoq.

Jonathan Motzfeldt-ip, Per Berthelsen-ip, Anthon Frederiksen-illu saniasigut ilaasortaapput: Ruth Heilmann aamma Lars-Emil Johansen Siumut, Kuupik Kleist aamma Johan Lund Olsen, IA-meersut kiisalu Augusta Salling Atassummeersoq.