Demokraatit 9 procentiinnarnik taaguunneqarput – kingullermik 2018-imi qinersisoqarmat 19,5 procentinit taaguunneqarput.Assi: KNR / Malik Brøns

Demokraatit affaannanngoraluartut – siulittaasoq pakatsissuteqanngitsoq

Demokraatit Naalakkersuisunit februaarimi tunuarput, qinersinerullu suaarutigineqarneranut pissutaallutik. Tamannali eqqortumik iliornerusoq, Jens-Frederik Nielsen isumaqarpoq.

Demokraatit Naalakkersuisunit februaarip ulluisa arfineq-pingajuanni tunuaramik Inatsisartunut qinersinissamut aallarniisuupput.

Partiilli siulittaasuata, Jens-Frederik Nielsenip qinersinerup aqaguani aalajangiinertik ugguutiginngilaa, aamma naak partiimit qinigaatitat affaannanngoraluartut.

Demokraatit 9 procentiinnarnik taaguunneqarput – kingullermik 2018-imi qinersisoqarmat 19,5 procentinit taaguunneqarput.

Taamaammat partii Inatsisartuni arfinilinnik qinigaatitaqarani pingasuinnarnik qinigaatitaqalerpoq.

- Soorunami uggornarpoq taama kinguartigisugut, partiip siulittaasua Jens-Frederik Nielsen oqarpoq.

- Naalakkersuisooqataajunnaarnerput eqqortuliornerusoq isumaqarpunga. Naalakkersuisooqataajunnanngilagut naalakkersuisuuniaannarluta, sunniuteqarusulluta politikerput piviusunngortikkusullugu naalakkersuisooqataanikuuvugut. Taannalu periarfissaajunnaarmat aninikuuvugut, taamaammat naalakkersuisooqataanermiit aninerput silaannarmik saliineruvoq, qinersisartulli maanna silaannaq salereerpaat, tamannalu eqqortuuvoq.

Tunuarlutik mattussisut

Demokraatit Siumup suleqatiginera ilorrisimaarutiginagu naalakkersuisooqatigiinnit tunuarpoq.

Taanna nunatta kujataani Kuannersuni aatsitassarsiornissamut suliniummut ilaatigut tunngavoq, tassani Demokraatit Siumumit suliniummut nikerartumik tapersiisoqartutut misigisimavaat. Taakkuli naalakkersuisooqataajunnaarnerat Siumup iluani isumaqatigiinngittoqarneranik aamma pissuteqarpoq – Demokraatillu februaarip ulluisa arfineq-pingajuanni naammatsipput.

Jens-Frederik Nielsenilli Inuit Ataqatigiit qinersinermi taaguunneqarnerpaasut siunissami suleqatigilernissaat mattutinngilaa. Aamma partiit taakku marluk isumaqatigiissutigingaatsiagaannut Kuannersunut tunngatillugu.

AAMMA ATUARUK Demokraatit naalakkersuisoqataajunnaartut

IA australiamiut aatsitassarsiutileqatigiiffiannut, Greenland Mineralsimut Narsamit 7 kilometerinik ungasitsigisuni Kuannersuarni ammasumik aatsitassanik piiaanissamut atuersissuteqarusunngilaq.

Suliniummut tapersiisut suliniutip suliffissarpassuarnik pilersitsinissaa nunattalu karsianut milliadilikkaanik isaatitsissutigineqarnissaa neriuutigaat. Akerliusulli pinngortitamut, avatangiisinut peqqissutsimullu kingunerluuteqangaatsiarnissaa ernumassutigaat.

Neriuutissaqanngitsoq

Suliniutip maanna tamanut tusarniaassutigineqarnera juunip ulluisa aallaqqaataani unittussaavoq.

- Kuannersuit pillugit isumaqatiginninniassagutta isumaqarpunga Kuannersuit eqqartorluarnissaa.

- ilaa qineqqusaarnermi eqqartorneqarnerani qernertuullunilu qaqortuutiinnarneqarpoq, kisianni eqqartorneqanngilaq Kuannersuit aatsitassarsiorfittut allatut aaqqissorneqarsinnaanissaa.

- Soorunami Inuit Ataqatigiit ersarittumik oqariartuutigivaat, tassa taanna naameerluinnarlugu, tassanilu aporfeqarpugut, kisianni taanna eqqartortariaqassavarput.

Demokraatit Inuit Ataqatigiinnit isumaqatigiinniarnermut aggersarneqassanerlutik suli naluaat – aggersarneqassagunillu takkutissallutik, Jens-Frederik Nielsenip oqaatigaa. Tamanna pinngitsoornagu piumasaqaateqartoqarnerani pinaviannginnerarpaa.

- Aggersarneqassagutta uagut anguniakkagut aggiukkumaarpagut. Kalallit Nunaanni ineriartornissaq qulakkeerusupparput, inuiaqatigiit pigissaarnerulernissaat atugarissaarnerulernissaallu qulakkeerusuppagut ineriartornikkut. Isumaqatiginninniarnerit ingerlanneqassagaluarpata, tassa taakku uagut ukkatassagut, Demokraatit siulittaasuat oqarpoq.

Isummersuutit

Nannumik assiliisoq © Vilhelm Lynge Hard

TV, radio: Qinersisartunik ataatsimiititsinerit

INATSISARTUNUT QINERSINEQ #IQ2021

Illoqarfinni assigiinngitsuni qinersisartunik ataatsimiititsinerit tv-kkut radiukkullu aallakaatilerpagut.

Sumiiffiit ornillugit imaluunniit Facebookimi quppernitsinni KNR-imi Qinersinermi apeqquteqarnissamut periarfissaqarputit:

facebook.com/qinersineq

Pilersaarutit uani takukkit