Demokraatit aappassaannik ajugaassangatinneqarput
Inatsisartunut qinersinissami Demokraatit ajugaassapput. Aviisip AG-p naatsorsueqqissaartarfimmik "Isuma"-mik suleqateqarluni qinersisartunik isumasiuinera saqqummeqqammersoq taama inerneqarpoq. Qinersisartut 973-it aperineqartut 31,2 procentiisa Demokraatit qinersimavaat. Taamaassappat Demokraatit siulittaasuat Per Berthelsen naalakkersuisut siulittaasunngorataannanngorpoq. Per Berthelsen-ip tamannamita qanoq tiguaa, qinerneqarnerpaassagunik naalakkersuisunngortitsiniarnerlutik?
- Tassami Demokraatit aaqqissugaanikkut massakkut ima inerissimatigipput immaqa partiinit amerlanerpaanit siuarsimanerulernikuullutik. Taamaattumik tupigisassaassagunanngilaq annerpaanngussagunik.
Per Berthelsen tamanna pillugu isumaqarnerarpoq partii annerpaajusup isumaqatigiinniarnerit eqqarsaatigalugit inissiiviit qullersaanniinnissaa ataqqineqartariaqassasoq.
- Demokraatiniilli neriuutigeqaarput tamakku partiinit allanit aaqqiagiinngissutitut inissinneqanngisaannassasut oqariartuutilli salliutinneqassasut, taakkua kiisalu inuiaqatigiinni pingaaruteqartut sullissutissat Demokraatinit qitiutinneqassapput.
Denokraatit naalakkersuisunngortitsissagunik Inuit Ataqatigiinnik suleqateqarusunnertik isertuutinngilaat.
- Qineqqusaarutit aallaavigissagaanni malunnarpoq nunatsinni piviusorsiortumik politikkemik eqqarsartut tassaanerpaasut Demokraatit, taakkununngalu qaninnerpaasumik eqqarsariartaaseqarlutik aamma ingerlasut tassaasut Inuit ataqatigiit. Ullumikkut oqartariaqarpugut Siumukkut avissaartuuppallaarujussuarput, imarisaasut piunnaarlugit sunngorsinnaanermik aallaaveqartumik aaqqigiinngissuteqarnerat sakkortoorujussuulluni. Taamaattullu Demokraatit tungaanniit peqataaffigiumanngilluinnarpagut.
Aviisit Sermitsiaq AG-lu tamarmik immikkut qinersisartunik isumasiuipput. Isumasiuinerni tamani Demokraatit taagunneqarnerpaasarput, isumasiuinernilu tamani Inuit Ataqatigiit Demokraatillu ajugaasuunissaat takuneqarsinnaavoq.
