- Naalakkersuisup oqariartuutaa uggornartuusoq isumaqarpunga. Tassami aningaasat amerlasoorujussuit pineqarmata, Anna Wangenheim (D) oqarpoq.Assi: Malik Brøns / KNR

Demokraatit 800 millioninut nutarterinissamut: Suliassat aallartinniarsigit

Peqqinnissaqarfiit nutarteriffiginissaannut aningaasaliisoqarnissaa tuaviuutigineqartariaqarpoq. Demokraatit taama isumaqarput, Atassutillu utaqqeqqaarniarneq akisussaassuseqannginnerarpaa.

800 millionit koruunit nalinginut peqqinnissaqarfinni nutarterisoqartariaqarnera atortutigullu nutarsaasariaqarneq Demokraatit Atassutillu maanna iliuuseqarfigeqquaat.

Pisariaqartitsineq peqqinnissaq pillugu ataatsimiititaliarsuup qulaarpaa.

Pisariaqartitsineq peqqinnissamut naalakkersuisup Kirsten Fenckerip tusaatissatut tiguaa. Politikikkut oqallisigitinnagu peqqinnissaq pillugu ataatsimiititaliarsuup nalunaarusiaata piareernissaa utaqqeqqaarniarpaa.

Tamannalu naammanngitsoq Atassut isumaqarpoq.

Peqqinnissaq pillugu ataatsimiititaliarsuaq

Peqqinnissaq pillugu ataatasimiititaliarsuaq Suleqatigiissitsisut 2019-imi ukiakkut ataatsimiinnermi siunnersuuteqarneranit pilersinneqarpoq, taamani Inatsisartuni amerlanerussuteqangaatsiartut tapersiipput.

Coronap ataatsimiititaliarsuup suliaqarnissaa kinguartippaa. Paasissutissanik katersineqarneq pingaartumik coronamik kinguartoortinneqarpoq.

Ataatsimiititaliarsuup nuna tamakkerlugu anganissaa pilersaarutaagaluarpoq, maannamulli Kommune Kujallermut Avannaata Kommunianullu kisimi angalasimavoq.

Ataatsimiititaliarsuaq Kommune Qeqertalimmukariartoraluarpoq, coronali pissutigalugu utiinnartariaqarluni.

Nalunaarusiaq innersuussutinik imaqartoq Inatsisartunut tunniunneqarnissamut ukioq manna kingusinnerusukkut piareertussaavoq.

- Isumaqarpunga suusupaginninneruallaalaaluatsiartoq, Atassutip siulittaasua Aqqalu Jeremiassen oqarpoq, nangipporlu:

- Ajoraluartumik naalakkersuisup (Kirsten Fencker aaqq.) partiia tusaamasaareerpoq namminiilivinnissaq sunit tamanit salliukkaat inuup peqqissusaanniilluunniit. Taamaammat tupinnarpoq. Inuup peqqissusaa pilliutigisussaanngilarput tamanit salliutittussaavarput.

AAMMA ATUARUK Peqqinnissaq pillugu ataatsimiititaliarsuaq: Nutarsaanissamut sanaartornissamullu 800 millionit koruunit pisariaqartinneqarput

Millionilikkaat amigaatigineqartillugit nalunaarusiap naammassinissaanut utaqqisoqartariaqanngitsoq Demokraatit isumaqarput.

- Naalakkersuisup oqariartuutaa uggornartuusoq isumaqarpunga. Tassami aningaasat amerlasoorujussuit pineqarmata pingaarnersiuineq pilersaarusiornerlu siusinaartunik ingerlanneqarsinnaaneri ujartorneqartariaqarpoq. Imaannginnami ataatsimiititaliarsuup suliassani naammassippagit sanaartornermut suliassartai annikilliumaartut, taamaattoqanngilaq, Anna Wangenheim (D) oqarpoq.

Nunamut tamarmut napparsimmavissaaleqisugut nalunaarusiaq piareerneqaqqaartariaqartoq

Peqqinnissaqarfinni nutarsaanissanut, nutaanik sanaartornissanut atortorissaarutinillu nutaanik pisariaqartitsineq peqqinnissaq pillugu ataatsimiititaliarsuup oqaatigaa. Ataatsimiititaliarsuup nalunaarusiani ukioq naatinnagu tunniuttussaavaa.

Soorlu Nuummi nuna tamakkerlugu napparsimmavimmik pilersitsinissamut 489 millionit koruunit pisariaqartinneqarput, Sisimiuni pilattaavimmik ernisarfimmillu nutaanut 35 millionit koruunit Ilulissani nakorsianut akunnittarfimmut nutaamut 27 millionit koruunit.

AAMMA ATUARUK Peqqinnissaq pillugu ataatsimiititaliarsuaq: Sulisut taarseraannerat tupaallannarnerpaavoq

Taannalu peqqinnissamut naalakkersuisup Kirsten Fenckerip tusaatissatut tiguaa.

Inuit Ataqatigiinneersoq Agathe Fontain, peqqissutsimut ataatsimiititaliami siulittaasuusoq, nalunaarusiaq naammassineqanngitsoq politikikkut isumerfigineqarsinnaangitsoq KNR-imut e-mailikkut allappoq, 'inatsisartut taamaalioraluarunik amigartumik tungaveqarlutik isummersussammatta'.

Siumumi aamma utaqqeqqaarniarlutik, partiip peqqissutsimut oqaaseqartartua Mala Høy Kuko oqarpoq.

- Taamanikkussamut nalilersuiumaarpugut takoriarutsigu suut pineqarnersut, taanna oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl