Demokraatineersoq Sermitsiamut tapersiivoq

Aviisip Sermitsiap Muuamaat ilaarlugu titartakkat saqqummersimmagit Siumukkut Atassutikkullu isornartorsiuisut Demokraatit naalakkersuineq pillugu oqaaseqartartuat Palle Christiansen inuttut nammineq isummerluni saqqummersitsineq pillugu tapersiivoq.

- Tamat oqarsinnaatitaanerat tunngaviusumik inatsimmi allassimasoq aamma nunatsinni tusagassiornermik suliaqarnermi atorneqarpoq. Muuamaallu ilaarlugu titartakkat Sermitsiap nammineq sapiiseqaluni saqqummiukkusukkunigit saqqummiunniarligit. Aamma taama ajornanngitsigaaq, Palle Christiansen taama oqarpoq.

Muuamaat ilaarlugu titartakkat pillugit nammineq inuttut isummani naapertorlugu oqaaseqarnini erseqqissaatigaa, kiisalu Demokraatit siulersuisuunerisa ataatsimiinneranni titartakkat immikkut oqallisigineqarsimannginnerat oqaaseqarnermini erseqqissaatigalugu.

- Danskit naalakkersuisuisa aamma paasisariaqarpaat nunatsinnissaaq naalakkersuinermik suliaqartut tamat oqartussaaqataanerannik paasititsiniaanerit tapersersorneqartut. Danskit naalakkersuisuisa titartakkat aallaavigalugit iliuuseqartarnerannik nersualaarinnittoq Palle Christiansen taama oqarpoq.