Deloitte: Napãtôq Frederiksenilu atuivallaarsimapput
Naalakkersuisut ilassinnermut aningaasartuutigisimasaat kukkunersiusarfiup Deloittep misissorlugit ullumi naammassivai.
Jens Napãtûp ilassinnermut aningaasartuutinik atuivallaarsimaneranik Radioaviisip Nuuk TV-llu avammut saqqummiussinerisa kingorna ilassinnermut aningaasartuutit Deloitte-mit misissuiffigineqalerput.
Naalakkersuisuni ilaasortat pisiniartarnerminni uppernarsaataat aningaaserivimmiillu aningaasat isertut anisullu allattorneqarneri tamaasa misissuiffigereerlugit kukkunersiuisarfik tusagassiutit aqqutigalugit imatut nalunaaruteqarpoq:
- Ataatsimoortumik naliliinerput naapertorlugu Naalakkersuisunut ilaasortaq naalakkersuisut ilassinninnermut aningaasanik atuinissaat pillugu naalakkersuisut kaajallaasitaat 1993-imi aggustip aallaqqaataanneersoq imaannaanngitsumik unioqqutitsilluni iliuuseqartarsimavoq, taama Deloitte-mit Jens Napaattooq pillugu nalunaaruteqartoqarpoq.
Piniarnermut aalisarnermullu naalakkersuisoq Rasmus Frederiksen pillugu oqaaseqaataasut pitsaanerusinnaagaluarput:
Imigassamut akulikitsumik ikittuunngitsunillu assut kingusissukkut aningaasartuuteqartarsimavoq aamma akuttunngitsunik imigassamut nereqatigiinnernullu aningaasartuuteqartarsimavoq nammineq inuttut atuinertut pissuseqartunik pisariaqartorlu naapertorlugu ileqqaarniartoqarsimanani, Deloitte taama naliliivoq.
Naalakkersuisuini ilaasortat sinneruttut annerusumik minnerusumilluunniit naalakkersuisut kaajallaasitaat tamatumunnga tunngasoq naapertorlugu aningaasartuuteqarsimapput.
Naalakkersuisut siulittaasuata Hans Enoksen-ip nalunaarusiaq ilungersunartutut isigaa. Maanna inatsisilerituut Nuna Advokaterne-rini sulisut qinnuivigisimavai ilassinnittarnermut aningaasartuutaasimasut utertinneqarnissaminnut inatsisitigut tunngaveqarnersut naliliiffigeqqullugit.
