Decembarip 18-at oqaluttuarisaanermi atsiorfiussanngilaq
Naak nunat assiginngitsut siuttuisa isumaqatigiissutissatut siunnersuut maanna oqallissigileruttoraluaraat, silap pissusaa pillugu aappaagu aatsaat inaarutaasumik isumaqatigiissusiortoqarsinnaanissaa ilimagineqarpoq.
Isumaqatigiissutissatut siunnersuut suli oqallisaaqisoq, Politikenimit pissarsiarineqareerpoq, USA-llu præsidentia Barack Obama Bella Centerimi isumaqatigiinniarnernut maanna peqataavoq, qanittukkullu oqalugiarnissaa ilimagineqarpoq.
USA-p præsidentia Barack Obama, Bella Centerimut apuuteqqammerpoq, Obamallu isumaqatigiinniarnissanut pingaaruteqartuunera, immikkut ilisimasallit qularutiginngilaat.
Det Hvide Husimilu atorfillit oqaasii naapertussagaanni ilaannakortumik isumaqatigiissusiortoqarnissaa Obamap orniginartinngilaa.
- Ilaannakortumik isumaqatigiissusiorsimasutut USA-mut uteqqilluni pissusissamisoornavianngilaq, Barack Obama sinnerlugu oqaaseqartoq, Robert Gibbs aviisimut Politikenimut oqarpoq.
Nunat 27-t isumaqatigiissutissatut siunnersuummik nutaamik saqqummiussisimanerat Bella Centerimit tusarliunneqarpoq, silaannaap annerpaamik gradinik marlunnik kiatsikkiartornissaa, nunallu siuarsagassat 2020-p tungaanut ukiumut 500 milliardit koruuninik ikiorserneqartarnissaat neriorsuutigineqartoq, Danmarkip Radioata nittartagaani atuarneqarsinnaavoq.
Tusarfiit atersineqanngitsut oqaatigaat, isumaqatigiissutissatut siunnersuut ataatsimeersuarnermi siulittaasooqarfimmit, tassa Danmarkimit saqqummiunneqassasoq.
Nunat 27-t siuttui, Bella Centerimi ippassaq unnukkut ataatsimiipput, USA-p nunanut allanut ministeria Hillary Clinton ataatsimeeqataasunut ilaalluni.
- Oqaloqatigiinnigut angusaqarluarfiupput, ministeriuneq Lars Løkke Rasmussen ataatsimeereernerup kingorna oqarpoq.
Tyskland, Frankrig, Tuluit Nunaat, Polen, Spania, Brasilia, Sydafrika, Japan, Australia USA-lu ilaatigut ataatsimeeqataapput.
Obama USA-mut qaqugu utissanersoq ilisimaneqanngilaq.
