Debora Kleist Isumalioqatigiissitami ilaasortassatut toqqarneqarpoq
Ane Hansenip Inatsisartuni sulinngiffeqarallarnera pissutaalluni Isumalioqatigiissitamit tunuarnissaa Naalakkersuisut pingasunngormat aalajangereeraallu Debora Kleist Isumalioqatigiissitami ilaasortassatut toqqarneqarpoq.
Isumalioqatigiissitallu sulinerata aallartinnerani suliap pinnaassutaasimanera Sara Olsvigip ajuusaarutigaa:
AAMMA ATUARUK Tunngaviusumik inatsisissaq pillugu isumalioqatigiissitap sulinini nangikkaa
- Isumalioqatigiissitami suliap imarisaa ullormit siullermit samminagu piffissarujussuaq nukipparujussuillu kikkut ilaasortaanissaannut isummersoqattaarnermut atorneqarput. Tunngaviusumik inatsisissaq pillugu Isumalioqatigiissitap siulersorneqarnerani aqutsilluarnerusoqarnissaanik piumasaqarpugut, suliallu torersumik ataatsimoorfiusumillu ingerlanneqarnissaanik sakkortuumik kaammattuivugut, Sara Olsvig oqarpoq.
Isumalioqatigiissitami ilaasortat:
Vivian Motzfeldt (S)
Jess Svane (S)
Mimi Karlsen (IA)
Debora Kleist (IA)
Per Rosing-Petersen (PN)
Nivi Olsen (D)
Siumup Isumalioqatigiissitami ilaasortaatitaata Mala Høy Kukop Inuit Ataqatigiillu ilaasortaatitaata Ane Hansenip Isumalioqatigiissitami ilaasortaaginnassanersut nalornissutigineqarnera pissutaalluni Isumalioqatigiissitap sulinini novembarimili unitsippaa.
AAMMA ATUARUK Mala Høy Kúko Ane Hansenilu isumalioqatigiissitamit tunuartinneqartut
Tamatuma kingorna Inuit Ataqatigiit siulittaasuata Sara Olsvigip Namminiilivinnermullu Naalakkersuisup Suka K. Frederiksenip sakkortuumik oqaaseqarlutik isumalioqatigiissitap sulinini nangeqqissagaa kammattuutigaat.
Sara Olsvig Suka K. Frederiksenilu isumaqarput Vivian Motzfeldt isumalioqatigiissitap katitigaaneranut akuliuttariaqanngitsoq.
Isumalioqatigiissitap sulinera nangeqqinneqartoq, Tunngaviusumik Inatsisissaq pillugu Isumalioqatigiissitami siulittaasoqarfiup sapaatip-akunnerata massuma ingerlanerani nalunaarutigaa.
AAMMA ATUARUK Suka K.: Isumalioqatigiissitap sulinini nangeqqittariaqarpaa
