- Nerisakka mamaarupput naamasaarullungalu quersortorujuullungalu. Anernera aamma iluaattarpoq, soorlu angummanneq ajulertarluni, Dea Lange oqarpoq.Assi: KNR

Dea Lange Qasiannguaneersoq: Illoqarfimmi mikisumi tunillatsissimasuulluni kanngunalaarpoq

18-inik ukiulik Dea Lange Qasigiannguani coronamik tunillatsimasuni siulliuvoq.

Dea Lange covid-19-imik tunillatsissimanerminik marlunngormat kalerrinneqarpoq.

Kalerrinneqaramilu erngertumik angerlarsimaannalerpoq. Taanna Aasianniit Qasiannguanut angerlaqqammerpoq.

Aasiannilu tunillatsissimanissani ilimagaa. Aasiannimi sapaatip-akunnerata siuliani tuniluuttoqarpoq. Tassanimi tunillatsissimasumik imerniartarfissiortoqarnikuuvoq.

Tunillatsissimasut Aasianni Nanuaqqami, Nanumi, Tulukkamilu tallimanngornermi juulip ulluisa 23-anni arfininngornerullu unnuaani juulip ulluisa 24-anni imerniartarfissiorsimasut tallimanngormat saqqummiunneqarpoq.

Taamaammat allamik tunillatsissimasoqarnissaa oqartussanit ernumassutigineqarpoq – tunillatsittoqarsimavorlu: Kommunimi tallimanngornermi tunillatsissimasut marloriaataat maanna tunillatsissimasuupput.

Dea Langelu Aasianni imerniartarfinni taakkunani aamma isersimasimavoq.

AAMMA ATUARUK Aasianni coronamik tuniluuttoqarfiusumi borgmesteri: Imerniartarfiit akissarsiffimmi matoqqatinneqarlik

Qasiannguanut angerlarnerminit sapaatip-akunnera qaangiuttoq ersiutinik malugisaqalerpoq.

- Nerisakka mamaarupput naamasaarullungalu quersortorujuullungalu. Anernera aamma iluaattarpoq, soorlu angummanneq ajulertarluni, Dea Lange oqarpoq.

Taassumalu allanut tunillaasimasinnaanissani ernumassutigaa. Qasiannguanummi angerlarnernermi kinguneratigut suli ersiuteqalinnginnermini katerinnermi annertuumi peqataasimavoq.

- Uilu Bar-imi imerniartarfimmi, Dea Lange oqarpoq.

Illoqarfimmi inuttuallaanngitsuni tunillatsissimasuulluni kanngunalaartoq

Dea Lange illoqarfigisamini coronamik tunillatsissimasuni aamma siulliuvoq. Illoqarfimmilu kikkut tamarmik imminnut ilisarisimaffigisaanni tunillatsissimasuulluni maannakkut kanngunalaarsoraa.

- Tusaamasatut misiginarpoq. Tassami Qasigiarmiullumi statusiliullattaartut kanngunalaarpoq, kanngunalaaraluarpoq kisiat eqqarsaatigivallaarnaveersaarpakka, Dea Lange oqarpoq.

Qasiannguani inuit 1070-it missaanniittut najugaqarput.

Dea Langep maleruaqqusat malillugit sissuerpoq, taamaakkaluartorli qanorluunniit mianersortigigaluaraanni tunillatsittoqarsinnaasoq oqaatigalugu.

AAMMA ATUARUK EQQORTOQ: Nunat akiuussutissamik marloriarlutik kapitissimasunik amerlanerpaanik innuttallit ukuupput

- Immaqa malikkaluarlugit tunillatsippunga, asuki nalunarami. Qanorluunniit aamma sissuertigigaluaraanni tunillatsittoqarsinnaagami.

Tunillatsissimasut amerlanerpaartaat akiuussutissamik kapitinneqanngitsuusut Nakorsaaneqarfimmit Paneeraq Noahsenip pingasunngornermi tusagassiortunik katersortitsinermi oqaatigaa.

Dea Langelu taakkununnga ilaavoq. Taannami kapitittussanngormat akiuussutissat Qasiannguani nungussimapput.

- Siullermik kapitittussaagaluarlunga nunguussaagama, piffissamik tunineqariarlunga taanna piffissaq takkukkama paasitinneqarpunga ippassaammat kapuuillutik nungussimagaat. Taava kapitinngitsoorlunga.

Isummersuutit

Nunatsinni coronavirusi pillugu
killiffik

Tunillatseqqasut 126  
Ullumi tunillatsittut 35  
Siullermik kapitissimasut 40.955  
Aappassaa kapitissimasut 35.924  
Tunillanneqarsimasut 504  
Uninngasut 1  
Anersaartuuteqartitaasut 0  
Toqquteqartut 0  
corona.nun.gl-imi kisitsit takukkit  
   Nutarterneqarpoq: 
Septembarip 21-iat 12:00
 

Coronavirusimik tunillatsinissaq pinaveersaaruk