De Radikalekkut ministeriuneq qinersinissamik aatsaat aqagu nalunaaruteqarsinnaatikkaat
Ministeriunerup Mette Frederiksenip qinersinissamik Folketingimi ataatsimiinnerup piffissami matumani ammarneqarnerani suaaruteqarnissaa utaqqineqarpoq.
De Radikalekkut danskit naalakkersuisuinut tatiginnikkunnaarnissamik nalunaaruteqarnissamik siooraasaaruteqarput, taamaaliortoqarpallu qinersinissaq ministeriunerup nalunaarutigisinnaavaa.
AAMMA ATUARUK Politikerertavut Folketingimut qinersinermi aalajangiisuusinnaasut
De Radikalekkut tatiginnikkunaarnissamik nalunaarutiginiagartik Folktingip ataatsimiinnerata ammarneqarnissaannut aallaqqaammut killillerpaat.
Tamannali De Radikalekkut siulittaasuannut Sofie Carsten Nielsenimut aalajangiisuussanngilaq, qinersinissaq marlunngornermi nalunaarutigineqarpat ministeriunerluunniit qinersinissaq pingasunngornermi nalunaarutigissaaneraa.
AAMMA ATUARUK Ministeriuneq qinersinissamik suaaruteqaqqusinermut oqaaseqarusunngilaq
Minkit pillugit ataatsimiititaliarsuup Mette Frederiksen danskillu naalakkersuisui sakkortuumik isornartorsioreeraalu, De Radikalekkut juulip aallaqqaataata missaani aalajangerput folketingimi aasaanerani sulinngiffeqareernermi ataatsimiinnissaq sioqqullugu qinersinissaq nalunaarutigineqassasoq.
Taamatullu aalajangernertik allanngortinngilaat.
Qinersinissaq ulluni tulliuttuni nalunaarutigineqanngippat, folketingimi ammaanersiorluni oqallittoqarnerani oktoberip ulluisa arfernanni tatiginnikkunnaarlutik nalunaaruteqassallutik De Radikalekkut nalunaarutigaat.