Angerlarsimaffeqanngitsunut suppatortitsisarneq atorneqarluartoq
Nuummi angerlarsimaffeqanngitsut inuuniarnermikkullu ajornartorsiuteqartut ikiorneqarnissaannut annertuumik pisariaqartitsisoqarpoq.
Nuuk unnukkut seqineq tarrilernerani
Allattoq Jaaku Lyberth
juunip 05-at 2016 18:15
Tamanna angerlarsimaffeqanngitsunut tapersersuillutik peqatigiiffiannit NoINI-mit malugineqarpoq.
Peqatigiiffik sisamanngormat ataatsimeersuarpoq.
Peqatigiiffik ukiut pingasut atuuppoq, marlunngornikkullu angerlarsimaffeqanngitsunut suppatortitsineq ingerlanneqartarluni.
Suppatoriartortartut 2014-miit 2015-mut 30 procentinik amerliariarput, amerlanerulernissaallu naatsorsuutigineqarpoq, peqatigiiffik NoINI nalunaarpoq.
Marlunngornikkut suppatortitsisarneq peqatigiiffiup NoINI-p suliniaqatigiiffiillu Nuummiittut Kalaallit Røde Korsiat aamma Frelsens Hæri suleqatigiillutik ingerlataraat.