David Cameron nunani sinnerlugu ajuusaarpoq

David Cameron oqarpoq nammineq nunani sinnerlugu pisoq ajuusaarutigalugu.

Nalunaarusiaq erseqqarilluinnartumik inerniliivoq, tassa tuluit sakkutuui siulliullutik eqqaassilerput tamannalu akerliussutsiminnik takutitsisut 13-it toqunerannik kinguneqarluni, 1972-imi januaarimi Bloody Sundayimi - sapaammi aattalimmi.

- Tamanna naapertuilluarnermut saatinneqarsinnaanngilaq, kukkuneruvorlu, tuluit sakkutuui sakkutuujunngitsunik eqqaassisut toqoraasullu pillugit tuluit ministeriunerat oqarpoq. Aap, sakkutuut ilaanneeriarlutik ikilikkanik eqqaassisarput toqutsisarlutillu, imaluunniit allat ikiligaasunik ikiuisarlutik, David Cameron oqarpoq.

Nalunaarusiamili immikkoortumi ataatsimi tuluit sakkutuui illersorneqarput, tassani oqaatigineqarluni taakkua angutinit sakkulisartunit, tassalu imaanngitsoq katuullinit akerliussutsiminnik takutitsisunit, eqqaanneqartut.

Sakkutuut aammattaaq salluliorput nassuiaallutillu eqqaanneqarsimallutik qaartartumeerneqartarsimallutillu, maannalu tassa sakkutuut eqqartuussivitsigut malersorneqassanersut eqqartuussisut aalajangiisussanngorlutik.

Nalunaarusiaq ima erseqqaritsigaaq, tuluit ministeriunerat utoqqatsingajalluni allaat.

- Naalakkersuisukka nunagalu sinnerlugit assorsuaq ajuusaarpunga, David Cameron oqarpoq.

1972-imi sapaatip aattaqaqisup kinguninguatigut misissuinikkut sakkutuut pinngitsuutinneqaraluarput, nalunaarusiarli ukiuni aqqaneq-marlunni ingerlanneqarpoq, taannalu Irlandip avannaani eqqissinissap sulissutigineqarneranut ilannguttutut takkulluni.

Nalunaarusiaq eqqissinissap sulissutigineqarneranut suli patajaatsuunngeqisumut nutaarsiassaassaaq, DR-imiit Jakob Illeborg DR-imi nutaarsiassanut oqaluttuarpoq.

- Irlandimiut amerlaqisut tamanna naammassisatut eqqortutut oqaatigissagunarpaat, tassami isumaqarama pereersut puigorneqarnissaannut Irlandillu avannaata nutaajusup Irlandillu avannaani ukiut nutaat ilagigaat, Jakob Illeborg naggasiivoq.