Dartmouth Universitetimi ilinniartut Ilisimatusarfimmiissapput

Ilisimatusarfik - USA-mit Dartmouth Universitetimit ulluni makkunani tikeraartoqarpoq. Suleqatigiinnissamut isumaqatigiissutip nutarternerata kinguneranik Ilisimatusarfimmi ilinniartut USA-mi universitetit ataqqisaasut ilaanneersunik atuaqateqartalersinnaassapput.

Ilisimatusarfimmi nunanik allanik suleqateqarnermi ataqatigiissaarisup suleqatigiinneq nuannaarutigaa, naak arlalinnik unammilligassaqaraluartoq.  

- Taava massakkut suleqatigiinneq annertusarlugu nikeriaqqittussanngorpugut, neriulluta Dartmouthimiit amerlanerusunik sivisunerusumillu ilinniartoqartarsinnaassalluta. Maannamut maani tikeraartorisartakkavut aasakkut tikeraartutsinnik taasarpavut, taamaallaammi sapaatit akunnialunni maaniittaramik, Hanne Søgaard Ilisimatusarfimmeersoq oqarpoq.

Ilisimatusarfiup aamma Dartmouth Universitetip ilinniartuminnik paarlaateqatigiittarnerminni illuatungeriillutik pissarsinissaat piumasaqaataavoq. Taamaattorli USA-meersunik ilinniartoqarnerulerneq Ilisimatusarfimmut unammilligassanik amerlanerusunik kinguneqarpoq.
 
- Ilinniartunut pineqartunut naammaginartunik inissaqartitsisariaqarpugut, ilinniartitsinermilu aalajangersimasumik pitsaassusilimmik ilinniartitsisinnaanissarput qulakkeerniassavarput, Hanne Søgaard oqarpoq.

Taassuma ilanngullugu oqaatigaa, Amerikamiut semesterii kalaallit semesteriinit piffissani allaanerusuni inissisimasarmata.  

Naak unammilligassaqaraluartoq Ilisimatusarfimmi ilinniartuuneq pissarsiffiulluartussaavoq.

- USA-meersut periaasiannut ilaavoq, ilinniartuutiminnik nunanut allanukartitsigaangamik, Universitetimi ilinniartitsisumik peqataatitaqartarlutik. Tamanna uatsinnut soqutiginartuuvoq, taamaalillutami nutaanik ilinniagaqarfigisinnaagatsigik. Tassami Dartmouthip ilinniartitsisuinik maanngartitsisinnaagutta ajornerpaanavianngilaq. Tamanna Ilisimatusarfimmut iluaqutaassaqaaq, Hanne Søgaard naggasiivoq.