Darfurimi eqqissisoqarnissaa pikitsitsisunit apeqquserneqarpoq

Sudan-imi naalakkersuisut Afrikami nunat peqatigiit eqqissineqarnissamik siunnersuutaat ullumi akueraat. Pikitsitsisut akuersinissaat utaqqiinnarneqalerput, taakkuli nangaassuteqarput qularnaveeqqutinillu piumasaqarlutik.

Afrikami nunat peqatigiit eqqissineqarnissamik nalunaarusiaat 85-nik qupperneqartoq naalakkersuisut iluarisaattut isikkoqartoq, Darfurimi pikitsitsisut oqarput. Illersornissaq pillugu annikitsuinnarmik nalunaarusiami allaqqasoqarpoq, Sudanimilu pissaanillit qanoq inissisimanissaat aamma allanneqarsimavoq.

Sudanip naalakkersuisui nunanit allanit atsiornissaminnut kimigiiserfigineqareerlutik atsiornissamut akuersipput, Darfurimilu pikitsitsisut atsioqataanianngikkunik Sudanimilu naalakkersuisunut akerliunertik attatiinnarlugu, nunanit allanit akerlerineqalissasut nunami pissutsinut malinnaasut arlallit oqarput.

Atsiornissaq unnuap qeqqanut killeqartinneqarpoq atsioqatigiittoqaraluarpalluunniillu eqqissinissaq sakkutuunik amerlasuunik ikiorteqarluni pinngippat Darfurimi eqqissisoqarnavianngilaq, sakkutuuliisoqarnissaalu suli pilersaarutigineqanngilaq.

Sakkutuut Afrikami nunat peqatiit Darfurimiititaat nakkutilliisuuginnartussaapput, eqqissiviilliortoqalissappallu akuleruteqqusaanatik. Taamaammat Sudanip Naalagaaffiit peqatigiit sakkutuunik eqqissisaasussanik Darfurimukartitsinngippat eqqissisoqarnissaa ilimagineqarsinnaanngitsoq, Frank Nelleman DR-ip ilanngutassiisua DR-imut oqaluttuarpoq.

Darfurimi ukiuni pingasuni akersuuttoqarsimanerani inuit 300.000-t tungaanut toqutaasimassangatinneqarput, millionilippassuillu qimaatitaasimallutik.