Danmarkimi ukiuni kingullerni immiorfeeqqat 90-init amerlanerusut pilersinneqarput. Massakkut nuannarineqartoq alla takkutilerunarpoq, aviisimi Erhvervsbladet-mi taama allaaserinnittoqarpoq.
Danmarkimi immiorfeeqqani siullersaalluni Bryghuset Braunstein kimittuunik imigassaliorfeeqqamik pilersitsiniarpoq, taamaalillutik imigassanik immiaaqqanit kimittunerusunik imigassaliorsinnaalerumallutik.
Taamaattumik imigassaliorfimmik Køgep umiarsualiviani illorsuarni pilersitsinialerput.
- Isumaqaratta nammineerluta likøriliorsinnaalerutta, snapsiliorsinnaalerutta whiskyliorsinnaaleruttalu nuannissagaluaqisoq. Pilersitsisinnaaneq uatsinni qitiujuaannarsimavoq aamma Braunsteinimi immiaaralioraluarutta imaluunniit likørilioraluarutta mikisunnguatut ingerlaannassaagut, Claus Braunstein Poulsen, Bryghuset Braunsteinimeersoq oqarpoq.