Danskit utoqqalinersiatik nunatsinnut nassarsinnaanngilaat
Danskit utoqqalinersiaqalereersimasut nunatsinnut nuukkaangamik ajornerusumik atugaqalertarput. Tamannalu folketingimi ilaasortap aappaata Kuupik Kleistip aaqqiiiviginiarlugu siunnersuuteqarpoq.
- Paasinikuugatsigu maani Danmarkimi utoqqalinersiat nunanut sunulluunniit nassarneqarsinnaasartut, soorlu; Danskit utoqqaligaangamik Spaniakkunnut nutserartarput utoqqalinersiatillu nassataralugit. Ungasinngitsukkut paasivarput, nunatsinnut Savalimmiunullu utoqqalinersiat taamatut nassarneqarsinnaanngitsut. Ilaatigut danskit utoqqaat, utoqqalisimallutik nunatsinnut nuussimagamik naatsorsuutigalugu utoqqalinersiatik nassarlugit nunatsinnut nuussinnaallutik, aatsaallu nunatsinnut nooreerlutik paasilersimagamikku taamaattoqarsinnaanngitsoq, ilaatigut taanna aallaavigalugu misissugaritipparput qanoq iliortoqarsinnaanersoq, tassa qallunaat nunatsinnut savalimmiunullu utoqqalinersiatik nassarlugit nuuttalersinnaanersut, Kuupik Kleist oqarpoq.
Eva Kjer Hansenip akivaatit, tamanna illuatungeriimmik aaqqiivigineqartariaqartoq. Tassa imaappoq, kalaallit Danmarkimut nuukkunik taava aamma utoqqalinersiatik pigiinnartariaqalissavaat, tamanna aamma eqqarsaatiginikuuijuuk?
- Uanga siunertarinngilara, kikkulluunniit ajornerusumik atugaqalissasut tassami aamma taanna saqqummiunnikuuara, taamaattumik ajornakusoorsinnaavoq aaqqiinissaq iluamik imaluunniit kikkut tamarmik iluarisaannik. Kisianni maani isumaginninnermi ministerip aamma nalunaarutigisimavaa massakkut qinersinerup kingorna nunatsinni naalakkersuisoqalernermi isumaginninnermi naalakkersuisunngortussamut taanna oqaloqatigiissutigerusullugu, taannalu neriuppunga piaartumik pissasoq, Kuupik Kleist oqarpoq.
Danskit utoqqalinersiallit nunanut allanut nuukkaangata suna toqqammavigisarneraat Kuupik Kleistip misissuivigitinniarpaa. Taamatuttaaq danskit isumaginninnermut ministeriata Eva Kjer Hansenip nunatsinni isumaginninnermut naalakkersuisumik oqaloqateqareernissaa utaqqimaarniarlugu.
