Danskit umiartortut tallimat iperagaapput
Danskit umiartortut tallimat umiarsuarmut Danica White-mut inuttaasut, ullut 82-it imaani ujajaanianit tigusaaqqareerlutik maanna iperagaapput.
Maanna umiartortut misigisaqapilunnermik kingornagut ikiorserneqassapput, taarsiisitsiniartoqassalluni nunallu tamat akornanni ujajaanianut akiuiniarnermi nukittorsaasoqassalluni.
Tassami danskit umiartortut tallimat Danica White-meersut imaani ujajaanianit tigusaasartorpassuarnut allanut ilaaginnarput.
Imaani ujajaaniat umiarsuit assartuutit 240-t siorna saassuppaat ukiormannalu saassunneqartut 137-nngoreerput.
Taamaattumik danskit suleqatigiissitaliorsimapput nunat tamat akornanni imaani ujajaaniartarnermut akiuiniarnerup qanoq nukittorsarneqarsinnaaneranik misissuisussanik.
Suleqatigiissitami ilaapput Imarsiornermik Qullersaqarfimmeersut aamma Nunanut allanut ministereqarfik, inatsisinik atortitsinermut ministereqarfik kiisalu illersornissamut ministereqarfik.
Aammattaaq umiartortut taakkua tallimat eqqartuussissuserisuat Knud Volschack oqarpoq, danskit imarsiornermut inatsisaat pisoqalisimasoq, danskit umiartortut inatsisinik malitassaqanngitsut, sillimmaserneqarsimanngitsut aamma umiarsuaatillit umiartortut angerlartinneqarnissaannut pisussaaffeqanngitsut kiisalu naalakkersuisut tiguaasunik isumaqatigiinniarusussuseqanngitsut. Umiartortut aammattaaq sillimaniarneq eqqarsaatigalugu isumannaallisaavigineqarsimanngitsuni angalasariaqartarput.
