Danskit umiarsuaat, Rusland avannaqqullugu kangianut aqqutikkut angallannermi maligassiuisuupput
Rusland avannaqqullugu kangianut aqqutip atorneratigut Europap Kangiatalu akornanni angalaneq 40 %-inik imaluunniit sapaatit akunnerinik pingasunik sivikinnerusarpoq, aamma ilanngullugu Somaliamiut imaatigut ujajaasuinik ujajaaffigitinnissaq pinngitsoorneqassaaq, imalunniit Suez-kanalikkoornermi Igitsimini perulluliortoqarneranit eqqugaaratarnissaq pinngitsoortinneqarluni.
Danskit umiarsuaannikukiut marluk matuma siorna Rusland avannaqqullugu kangianut aqqutikkoortoqaqqaarpoq. Danskit umiarsuaatileqatigiiffiata Nordic Bulkip, Jyllands-posten naapertorlugu, umiarsuit 10-t 15-illu akornanniittut ukiormanna Rusland avannaqqullugu kangianut aqqutikkut angalatissamaarpai.
Angallannerup annertusarneqarnissaa Ruslandip ilungersuutigaa, ilaatigullu aamma sikunik aserorterussuarnik atomip nukinganik ingerlatilinnik ikiuerusulluni neqeroorutigisinallugu. Ukiormanna angalaniartunut akuersissutit 200-t tunniunneqarsimapput, naak umiarsuit tamarmik angalanissaat ilimagineqanngikkaluartoq.
Issittumi umiarsuit angallannerulernissaat kalaallit tungaannit siornatigut ernumanartoqartinneqartarsimavoq, aamma nunat tamat imaatigut angallannermut suleqatigiiffissuata IMO-p Issittumi imaatigut angallannermut malittarisassanik nutaanik aalajangersaaniarluni maanna suliaqarpoq.