Danskit tusagassiortut Nunarput soqutigilluarpaat
Danmarkimi tugasassiorfiit Kalaallit Nunaat samminngisaannarsimallugu ukiup affaani kingullermi aviisit saqqaat ulikkaartalerpaat tv-aviisillu aamma ilanngutassianik imaqarluarlutik.Tusagassiuutit naqitat, radiokkoortut tv-kkoortullu qinersinermut atatillugu allaaserinnittussanik, immiussisussanik teknikkikkullu sulisunik Naalagaaffeqatigiit avannarlersaannut ikigisassaanngitsunik aallartitsisimapput.
Kalaallit politikerit suliatigullu kattuffinni siuttut tamaasa Danmarkimi ilisimaneqarpallaannginneri ersarittupilussuuvoq, 21 søndag-millu ippassaq isiginnaartut maluginiarsimassavaat aatsitassanut naalakkersuisoq Ove Karl Berthelsen aamma SIK-p siulittaasua Jess Gustav Rasmus Berthelsen paarlaanneqarsimasut. Aamma assigiimmik kinguliaqartoqartillugu inuit kikkuunneri immikkoortikkuminaassinnaapput. Aammali oqartoqarsinnaavoq tusagassiortut misissuilaarsimasinnaagaluartut.
'Debatten'-ip taassuminngalu aqutsisup inunnik anersaaliisinnaasup sukkasuupilussuarmillu oqaluttartup sulisuni tamaasa Air Greenlandip timmisartuutaanut poortorsinnarlugit Kalaallit Nunaannukaappai nunatsinnilu inatsisartunut qinersinissaq pillugu immikkut aallakaatitassiorluni, aammattaaq tassunga atatillugu Martin Henriksen DF-imeersoq silap pissusiinullu tunngasunut ministeri Martin Lidegaard oqallinnermut minutsinik tallimanik sivisussusilimmut peqataatinniarlugit ilaserisimavai.
Dagbladet Politikenip Kalaallit Nunaat pillugu apeqqutit aviisip saqqaani akulikitsumik sammisarpai, tamannalu aamma Berlingske Tidendemut Kristeligt Dagbladimullu atuuppoq. Ulloq unnuarlu nutaarsiassaqartitsiviup sapaatit akunnerata naanerani sammisai tassaapput pisuussutit nunatta iluaniittut, aatsitassat qinersinerlu sammineqarput, aammattaaq DR-ip politikkikkut oqaaseqartartut nuimanersaat Ask Rostrup qinersineq sammisinniarlugu Kalaallit Nunaannut aallartinneqarsimavoq.
Danskit tusagassiorfii ileqqorisartagartik malissagunikku, taava nutaarsiassatigut soqutiginassusaa malillugu aamma nunatsinnik sammisaqarnerat annikilliartussaaq, maannakkorpiarli Kalaallit Nunaat kalaallillu danskit tusagassiorfiinit sammineqangaatsiarnissartik naatsorsuutigisinnaavaat.
