Danskit tunisassiaannik killilersuinerulersitsisoqarniarpoq

Danskit muuamaamik upperisallit arfiniliusut Bahrainimut aqagu upperisaqaqatiminnik 300-nik isumasioqatiginnikkiartorlutik aallarpata Muuamaamik titartakkat peqqutigalugit Kangiani Qiterlermi danskit nioqqutissiaanik killilersuineq sukannernerulersinneqarsinnaavoq.

Danskilli muuamaamik upperisallit palasiata angalaqataasussap Abdul Wahib Petersenip piviusut aallaavigalugit paasititsinissani siunertaraa. Taassuma saniatigut Muuamaamik upperisallit palasii danskillu Muuamaamik upperisallit kattuffiinersut sisamat Bahrainimut isumasioqatigiinnermi peqataassapput. Peqataasussallu isumasioqatigiinnermi oqaasissai tamakkerlugit DR-imit paasineqarsinnaasimanngillat. Taakkulu oqaasissai pingaaruteqartorujussuupput.

- Peqataasut ingajattajaarlutik oqalussappata Muuamaamik upperisaqaqatigiit danskinut kamannerat sakkortuseriarsinnaasoq Egyptinimi danskit ilisimatusarfianni itsarnisarsiuup Hanazir Deip oqaatigaa.

- Danskit nioqqutissiaasa killilersorneqarat taamaaginnassasoq qularinngilaa, Nibur Institutemi lektori Muuamaamillu upperisallit pillugit immikkut ilisimasallip Jørgen Bæk Simonsen oqaatigaaq nangipporlu Rigsadvokatip sapaatip akunnerani kingullermi Jyllands Postep eqqartuussivilersuunneqannginnissaanik aalajangiinera sakkugineqarsinnaasoq.

Hanazir Dei tamatumunnga isumaqataavoq:

- Eqqartuussivik aqqutigalugu eqqunngitsuliorfigitittutut misigisimanertik suliarineqarsinnaanngimmat allatut pissuseqarnissaat ilimagisariaqarparput, Hanazir Dei oqarpoq.

Dansk Folkepartiip nunanut allanut tunngasunik oqaaseqartittagaata nunanut allanut ministeri piumasaqarfigisimavaa danskit Muuamaamik uppersallit isumasioqatigiinnermi peqataasut oqaasii immiuneqassasut danskit oqaasiinut nutserneqarnissaat anguniarlugu.

Bahrainimi isumasioqatigiinneq pingasunngorpat aallartissaaq ullunilu marlunni sivisussuseqassalluni.