Danskit svenskillu qalasersualialerput
Qalasersuarmi, sikuiuitsumi avannarlermi, kingumut angalasoqartussanngorpoq. Ippassigami tusarparput russit qalasersuarpiami immap naqqani erfalasuminnik ivertitsisut, maannalu tutsiuppoq, danskit svenskillu ilisimatuut peqatigiillutik, umiarsuaq sikunik aserorterut atorlugu avannaarsuanut sapaatiuppat aallassasut.
Ilisimatuut nunat avannarlerneersut taakku - Danmarkip naalagaaffeqataasalu issittup imartaani pisuussutit siunissami oqartussaaffigilersinnaanerannut uppernarsaatissanik peqarnersoq paasiniarlugu angalassasut, aviisi Information allappoq.
Suli tassa ilimagineqanngilaq Danmarki Nordpolimik piginnittutut imminut suaarutigisinnaassanersoq.
- Paaseqqaartariaqarparput sermip ataani soqarnersoq, agguaassassaqarpallu qanoq agguarnissaa siunissami isumaqatigiinniutigineqarumaarpoq, Christian Marcussen, ilisimasassarsiornermi akisussaasoq oqarpoq.
Ilisimatuut svenskit sikunik aserorterutaat Oden atorlugu angalanerminni russit sikunik aserorterutaat atuumimik ingerlatilik ikiortigissamaarpaat. Ilumulli qalasersuaq angusinnaassaneraat nalunarallarpoq.
Danskit svenskillu ilisimasassarsiornerat 60 mio. koruunit tungaanut akeqassaaq, suliniullu taanna issittup imartaata immap naqqani killeqarfii pillugit ilisimatusarnermut 2003-mili aallartittumut attuumassuteqarpoq.
