Danskit sumi napparsimmavinni atortusisarnerat nalilersorneqartalissaaq

Meeqqat sanaavinik napparsimmavinni atortunik pisinianngilagut. Taama erseqqitsigisumik Danske Regioner oqariartuuteqarput, Sverigemi misissuisimanerit saqqqummiunneqareersullu. Nunat Avannarliit napparsimmaveqarfii meeqqanit sananeqartarsimasunik napparsimavinni atortunik soorlu; pussuguteeqqanik, pilattaanermut atortunik, kiisalu tingusissutinik pussugutaasanik meeqqat arfineq-marlunnik ukiulillit Pakistanimi fabrikkini tamakkuninga sanasarsimasut misissuinermi paasineqarsimapput.

Inooqataaffigisinnaanngilarput meerannguit atugassarititaasut ajoqisut iluanni atugassaqartitaallutik napparsimavimmi atortussanik sulisinneqartarsima-nerat.

- Taamatut oqarpoq Bent Hansen, Danske Regioner-imi siulittaasuusoq.

Ippassarlu Danske Regioner-imi siulittaasup, pisisartuni pisiniartarnermut tunngasut tamaasa misissoqquvai. Paasisallu takutippaat napparsimavinni atortunik pisiniartarnermut tunngatilugu ajornartorsiut

Ilimagisamiit ajornerujussuusoq.

Svenskit Kattuffiata SwedWatch-ip misissuisimaneranit paasineqarpoq, meerannguit arfineq marlunnik ukiullit napparsimmavimmi atortussanik sanaartornermi sulisorineqartarsimasut soorlu; pussuguteeqqanik, pilattaanermut atortunik, tingusissutinillu. Meeqqat 12 tiimit angullugit seernartulerisinneqarlutik saliisorineqartarsimapput.

Suliffissuarni angisuuni pissutsit naliginnaasumik ajoquteqanngitsut svenskit misissuisimanerisa takutippaat, atortussanillu pisiortornermi ajornartorsiorfiusut tassaasut suliffeqarfinnguit mikisut.

Danske Regioner-illu tullissaanik pisiortorfissaminnik ujaasilerunik malittarisassat suliffeqarfiit avatangiisaannut kiisalu meeqqat sulisorineqartarnerannut tunngasut pisiortorfiusunit tamarmik malinneqassasut neriorsuutigaat, taama naggasiivoq Bent Hansen.